زاوية المرسال

عندما يتجسد الشيطان .. بقلم / هاميس جمال

عندما يتجسد الشيطان
بقلم / هاميس جمال .
بشوفها جمله مختصرة جداً و حقيقية لتوضيح النرجسية بكل صورها ، فهو حقيقى شيطان بكل معانى الكلمة .
هتكلم ف المقال دة عن
« الشخصية النرجسيه » بكل ظروفها و أسبابها و أنواعها و إزاى كمان اتعافى منها .
الاول يعنى إيه نرجسية :-
———————————-
الأسطورة بتقول أنه شخص اسمة نركسوس كان معجب بنفسة فوق الوصف لدرجة أنه اعجب و اتفتن بجماله لما كان بيشوف انعكاس صورته ف النهر
وهو ما يعرفش أن دى ملامحة هو و كل يوم إعجابه بنفسة و ملامحة تزيد عن اليوم اللى قبله لدرجة أن الالهه لعنته و بدلت هيئته ل « زهرة النرجس » اللى كلنا عارفينها ، بعد ما وقع ف النهر و مات من شدة إعجابه و نظرة لنفسة ، ف الالهه رجعته للحياة و لكن ف شكل الزهرة
تعريف النرجسى :-
————————–
إذا النرجسى هو شخص محب لنفسة بالدرجة الأولى ، شايف نفسة فوق ف أعلى سما وكل الناس ف أسافل الأرض .
بيتعامل إنه « الإله الاعظم و كل البشر مجرد عبيد »
أسباب النرجسية :-
———————–
دايما التربيه و نشئة الطفوله السبب الأساسى ف يا إما اتربى على الإهانة و العنف الأسري و التقليل منه قدام الناس ، أو العكس أنا عاش طفل مدلل بزيادة جدا و كل طلباته أوامر ، و للأسف متعلمش تحمل أى مسؤليه .
نتكلم بقى عن أنواع الشيطان المتجسد فى هيئه إنسان
النرجسية نوعين
أولا النرجسى الواضح :-
——————————
و دة سهل أنه يتعرف من خلال بعض الجمل و التصرفات ف « لغة جسدة » تعالوا اعرفكم عليها
١- بيتكلم عن نفسة كتير جدا اكتر من العادى و دايما كل كلامة بيبدأ بكلمة « أنا »
٢- دايما رأسة مرفوعة لفوق عن الطبيعى ، لانه شايف أنه أعلى قيمة من الناس .
٣- بيقاطع غيرة ف أى حوار لانه عايز يكون هو محور اى موضوع و الكل يتكلم عنه .
٤- يقلل من اى شخص قدامة حرفيا .
٥- خالى نهائياً من اى مشاعر و لو أظهر ليك فتات مشاعر ف دة تمثيل بنسبه ١٠٠٪ علشان عايز منك مصلحة ، و اول ما بتنتهى بيرجع تانى زى ما كان قمة القسوة
تعالوا نقرأ كدة شويه جمل من أقول النرجسين لما اتكلمت مع أشخاص منهم ، و صدقونى دى تجربه و تعامل معاهم فعلا مش مجرد معلومات .
خد عندك يا سيدى بعض الجمل و ياريت تشاركونى لو في جمل سمعتوها و انا ماقلتهاش
١ – انتى أو انت فاكر نفسك اية .. انت من غيرى ولا حاجة .
٢- متفكرش تانى و خلى افكارك لنفسك .
٣- هو انتى شايفة نفسك جميله أو جميل .
٤- جاتك القرف عليك و على أصحابك و اهلك ، مين دول اللى اعملهم اعتبار .
٥- بكرة تتمنى تشوفنى و تسلم عليا .
٦- ذوقك ف الهدايا وحش أوى أوى ياريت متجبيش حاجة تانى ، لان ذوقى أنا الاحلى طبعا .
و لو النرجسي ذكر هتلاقيه يقولك أن كل ستات الكون هتموت عليه و على إشارة منه ، و العكس لو هى أنثى
و غيرهم كتير اوى لا تحصى ولا تعد من الجمل اللى كلها تهديد و وعيد ، و غطرسة لو الضحية غلطت غلطة غير مقصودة .
الشخصية النرجسية ممكن نفهمها بسرعة لو ركزنا معاها شوية ف الكلام و التصرفات .
نتكلم بقي عن النوع التانى من النرجسية و هو ….
النرجسى الخفى :-
———————–
مستحيل تعرفة ف البدايه أبداً ، لأنه بطبعة عاشق للبدايات ، و بس و لما بتتعمق معاة بتتصدم
فى جمله كدة كتير بنسمعها ( مش دة اللى حبيته ) و ( مش دى الملاك اللى كانت معايا ف البدايه ) ( أنا مش فاهم هو ليه بقي قاسي كدة بعد الحنيه اللى وعدنى بيها )
دى أقل قليل من أقول ضحايا النرجسى الخفى .
طيب هو ممكن يعنى يتعرف ؟؟
اه ممكن طبعا و لكن محتاج تركيز شديد ف التعامل و ف كل كلمة بيقولها .
ازاى أعرف الترجسى الخفى
١- هتلاقيه ماشي يدلدق إهتمام بسبب و من غير سبب ( كلتى .. شربتى .. نمتى .. صحيتى ) و كم من كلمات الاطراء و المشاعر الفياضة و انتم أصلا لسة عارفين بعض من ساعة .
٢- مش هيحب أبداً يتكلم عن نفسة ولا عن شخصيته .
٣- مستمع رائع جدا ليك و دة طبعا مش حب و أتحدى ، و لكن لانه عايز يجمع كل نقاط ضعفك علشان يحدد أمتى يستغلها لمصلحته الشخصية .
٤- فكر كدة و تعمد إنك تزعله ،، هتلاقى بركان غضب غير طبيعى و انفجر ف وشك .
هو النرجسي بيعرف يلعب .. اه دة أستاذ ف اللعب …
ألعاب النرجسى سواء كان خفى أو واضح :-
—————————————-
١- « السرقة »لانه متأكد أن حقوق الناس هى ف الأساس حقة الشرعى ف هتلاقيه يبرر السرقة ، و لو جدع خليه يعترف بسرقة بعد ما تكتشفها مهما كانت الادله ضدة .
« دور الضحية » علشان يكسب تعاطف الناس كلها ضد ضحيته الاصليه .
٢- « الكدب » حياته سلسله من الكدب المتقن ، اللى هو مستحيل تعرف تكشفة ، غير بعد مجهود منك لكشف كدبه و ألعيبه .
٣- « الصمت العقابى » و ما ادراك بالصمت العقابى ، علشان يدخلك ف دائرة التشكيك ف نفسك ، و طول الوقت تسأل هو أنا عملت ايه للخصام و الزعل دة كلة .
٤- « التشهير » بالضحية طول الوقت قدام كل الناس و خصوصاً لو كانت الضحيه محبوبه من الناس و المجتمع ، لانه غيور و منعدم الثقة بالنفس .
ندخل بقي على جزء مهم جدا من التعامل مع النرجسى و هو …
التعافى من شر النرجسى :-
———————————–
١- تعرف تكون مرآيا … بمعنى انك تعكس ليه كل تصرفاته تجاهك مهما كانت ( قلل منك !! تقلل منه ) .
( تجاهلك ف أى تجمع بينكم !! تجاهله ف نفس التجمع ) .
٢- أرفض الأذى منه و خليك شديد ف الكلام و التعامل معاة .. و خد بالك أنه مش هيسكت لانه بكل خبث و مكر هيحاول مرة و أتنين آذيتك بكل الطرق الممكنة علشان متخرجش من قبضته لأن زى ما قلنا هو بيطلع عليك كل العقد اللى جوله .
٤- اعتمد على نفسك ف كل صغيرة وكبيرة بلاش تحتاج ليه نهائي ، لانه لازم يشوفك طردته من حياتك طرد نهائي و بلا رجعة .
طيب امتى النرجسي ينهار تماما ؟؟
التهميش و الطرد النهائي من حياتك دة اكبر قاتل النرجسي
أنه كمان يشوفك قوى جداً و أنك مستحيل ترجعله بعد ما طردته بلا رجعة من كل حسابتك .
يارب تكون ألميت بكل الشخصية النرجسيه مع انها أكبر من المقال بكتير جداً .
أعان الله كل ضحايا النرجسى وقواهم على أبتلائهم .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق

يرجي إلغاء تفعيل مانع الاعلانات

يرجي إلغاء تفعيل مانع الاعلانات حتي تدعمنا على الاستمرار فى تقديم المحتوي المميز واحدث الاخبار