لوغارتمات النفس البشريه
بقلم/ هاميس جمال
حياتنا عامله زى فصول السنة فيها الواضح و الصريح زى { الصيف و الشتاء } .
و فيها اللى صعب تفهمة زى { الربيع و الخريف } يوم حر و يوم برد و يوم هادى و جميل و يوم زوابع و رياح .
البشر كدة بالظبط ، نسخة من فصول السنه ..
فيهم الواضح ف معاملاته مهما كانت سواء حنيه أو قسوة .
و فيهم اللى وانت بتتعامل معاه مش فاهمة ولا عارف نواياه من ناحيتك .
ومن خلال تعاملاتى من البشر تقدر تقول انى شوفت منهم تقريباً كل الفصول .
تعالى سوا كدة واحدة واحدة أعرفك عليهم ..
ناس زى فصل الصيف …
واضح و صريح فى مشاعره زى الشمس .
هتحب معاه حرارة مشاعره ، هتحس إنك عفوى و متحرر من ضغوط الحياة .
مش هتخاف تغلط معاة أو قدامة .. بالعكس هتلاقى حضنه مفتوح ليك طول الوقت بالمغفرة اللا متناهيه .
دة بقى هتلاقيه بيحبك زى ما أنت بكل ما فيك من عيوب قبل المميزات .
هتشوفه واقف ف ضهرك زى الأسد يحميك و يحافظ عليك .
بيدعمك و مصمم إنك تنجح ف حياتك ، لأنه شايفك و مصدق حلمك و عايز يوصلك لأعظم درجات السعادة .
و فى اللى زى فصل الشتاء
كل ما يحيط بشخصيته هو ( البرود و الاكتئاب و الغموض ) على شويه زوابع و أمطار رعديه بدون سبب واضح غير إنه عايز يتعب أعصابك و يوترك طول الوقت
دة بقى هتلاقيه مش شايفك أبداً مهما قدمت ليه ، خافى عنك حقيقته و شخصيته زى ما السحاب خافى وضوح الشمس و سط بهجة النهار .
و مهما اتكلمت معاه و اشتكيت تصرفاته … هو بكل أسف ملوش ( أُذن تسمع ) ولا ( عين تشوف ) و لا حتى ( قلب يحس ) المشاعر عنده حقيقى تحت الصفر تحس معاه كدة انك فى قارة انتركاتيكا و مهما حاولت و عافرت مش قادر تعدى الجدار الجليدى اللى هو عايش فيه ، و تفضل أنت واقف فى محطة الإنتظار ، مستنى منه إشارة رضا عنك .
إللى زى دة من قلبى و خبرتى ف الحياة بقولك أمشى و أبعد عنه و إنت الكسبان .
نكمل بقى على فصل الربيع …
الناس المبهجة و الحلوة بزيادة اللى هتشوف نفسك وأنت معاهم إن الحياة ( بقى لونها بمبي على رأى سعاد حسنى ) . ناس جميله و قبلاك زى ما أنت . طيبين و ودودين ، و بتلتمس الأعذار دائماً للغير. ، مريحين فى تعاملاتهم ، مشرقين بالتفاؤل دائما ، و الحنيه غالبه عليهم .
وجودهم بيطمنك ، الحياة معاهم مرحة و لذيذة ، بيتمنولك الخير اللى نابع من قلوبهم .
حلوين أوى يا جدع الناس اللى زى دى ، ياريت يكون فى منهم كتير فى حياتنا .
نكمل باقى حكايتنا مع الفصل الغريب الرهيب و هو الخريــــف ، و ناسه !!!
أعتقد أننا قابلنا كتير جداً من الخريفين !!
الناس اللى مش عارف تحدد مشاعرهم تجاهك ، و لا نوايهم .
هل هما زى الصيف واضحين ف حرارة محبتهم ، ولا طاغى عليهم برود الشتا ؟؟
يوم هما معاك قلباً و قالبا ً، و يوم تانى هما نقيض ليك بردو قلباً و قالباً .
شايلين جواهم نقض ليك هما بس اللى عارفينه .
قدامك بيحبوك جداً ، و لكن فى ضهرك هيتقال عليك ما لا يحمد عليه عقباه .
هتلاقيهم واقفين ليك ع الغلطة ، و فى أشد إنتظارها كمان .
غضبهم عليك كله زوابع و أعاصير ، و فجأه يهدوا كأن محصلش أى حاجة .
تقدر تقول كدة أنهم بيعاملوك بمزاجيه تامه .
و إنت مش من حقك حتى ترد على انفعالاتهم الغير مبررة ناحيتك .
البشر هما كمان زى فصول السنة كدة .
فى اللى هيحبك و عكسه اللى هيكرهك !! و بردو بدون سبب .
فى اللى هيتعامل معاك بسطحية تامه ، و عكسة المتعمق ف جوانب حياتك بكل خير و حب .
فى اللى بينفعل عليك بدون أسباب و عكسة البارد ف مشاعره و حياتة .
و مابين الشخصيات دى كلها ؟؟؟
مطلوب منك تتأقلم ليس إلا ..
إحساس مجهد إنك تحاول تتعامل مع كل الشخصيات دى و الطباع المختلفة لكل واحد فيهم .
لكن أقولك نصيحة ….
بلاش تجهد نفسك فى إرضاء شخص ، إنت متأكد بإنك مهما عافرت ف الحياة ، مستحيل هتنول رضاه .. و دة مش عيب فيك .. لكــــــن العيب فيه هو .
كمل مع اللى اختارك وسط زحمة حياته ، و شايف إن وجودك مكسبه من الدنيا علشان حقيقى دة اللى يستحقك .
أتعامل بسطحيه بعض الشئ مع الأشخاص المزاجيين ، لأنك هتعيش فى وجودهم ف حيره من أمرك و لسان حالك بيسأل ( هو أنا بالنسبالهم إيه) .
أبعد كل البعد لما تحس إن رصيد محبتك و غلاوتك فى قلب اى شخص بقت ( صفر ) .
خلى قلبك غالى ، و ثق أنك أكيد هتتعوض بالأجمل منهم .
و أخيراً هقولك جمله و خليها شعارك فى الحياة …
إنت تستحق تتحب … تستحق تتشاف طول الوقت مش بس أغلبه .
58 3 دقائق
