تعالى كدة الأول ندخل ف رحله جوه نفسك !
عايزاك تقف قدام المرايا ، و تتأمل ملامحك كويس .
تتأمل كمان ملامح روحك لأن دى اللى تهمنى و المقال يقصده .
أولاً .. كام تغير طرئ على ملامح وشك و جسدك و أية كانت أسبابه ؟
هل تقدم السن ، و إصابتك أمراض الشيخوخة ؟
إصابتك النحافة و لا العكس إصابتك السمنه المفرطة ؟
شعرك الأسود أتغير ، و اللون الأبيض سابق الزمن و جرى على شعرك بسرعة و بدأ بالظهور ؟
ولا التجاعيد بدأت تقولك أنا أهو موجودة على كل خطوط وشك ؟
طيب فكرت إزاى تتخلص من أى حاجة مضايقاك ف شكلك أو جسدك ولا واقف تتفرج على نفسك و هى بتتغير قدامك وإنت مش راضى عنها ولا حتى حببها ؟؟
و بدل ما تفكر إزاى ترجع زى الأول بالملامح و الجسد اللى كنت علية أو اللى بتحلم بيه !!
لأ وقفت قافل عنيك علشان متشوفش و متتغيرش .
تعالى بقى لنفسيتك !!
كام مرة وصفت نفسك بالفشل ، و إنك عاجز عن القيام بأى إنجاز تعمله ؟
كام مرة قلت أنا مقدرش على فعل نشاط معين أو هقدر أبدأ حتى فشغل جديد ؟
عد كدة كام مجازفه عملتها ف حياتك ؟
عارف السبب أية ؟؟؟
عقلك الباطن هو السبب الرئيسى عن حياتك اللى أنت عايشها دلوقتى !
آه دة حقيقى مش كلام أوهام .
عقلك الباطن هو المسؤل الأساسي فى حياتك ، لأنه مطيع ليك لأبعد حد .
و على فكرة هيصدق كل الأوامر اللى بتمليهاله .
عقلك الباطن هينفذ كلامك و أفكارك ، مش مجرد هيسمع بس .
لما توصف نفسك بالفشل هيجذب ليك كل طاقات الفشل .
و لو وصفت نفسك بعدم الإستحقاق ، هتلاقى نفسك بعيد عن كل الناس اللى بتحبك ومش هتصدق كمان إنك ممكن تتحب لان شعارك المرفوع قدام الكل هو ( أنا مستحقش ) .
لو كرهت نفسك طبيعى جداً المحيطين بيك يكرهوك لأن دى مشاعرك اللى خارجة منك ليهم ، طاقة كراهيتك لنفسك وصلت الناس .
عقلنا الباطن أذكى مما نتصور .
عقلنا الباطن بيجذب لينا كل الطاقات من حوالينا و إحنا مش حاسيين .
اعرف كمان أن عقلك الباطن مش بينام و إنه شغال جواك ٢٤ ساعة .
هقولكم حبة نصائح كدة ع السريع يارب تساعدكم على الحياة الناجحة و السعيدة ، و محاوله على تخطى الإحباطات اللى ممكن تكون عايشها .
أولا .. إحذروا من الصفات السلبيه للنفس لكن إعكسها بصفات إيجابية .
ثانيا .. حاول قدر المستطاع تتغير للأحسن ، و التغير اللى أقصده سواء جسدى أو نفسى .
ثالثاً .. حب نفسك جدا و إقبلها ، كبرها و أرفع من قيمتها ، و قّدرها دايماً .
رابعاً .. أبعد عن أى مصدر للإحباط و التوتر ، و عن أى شخص يقلل منك و من أحلامك .
خامساً .. أرجوك صدق إنك تقدر تصنع لنفسك كل اللى اتمنيته و حلمت بيه ، مهما كان مستحيل .. فإنت تقدر .
سادساً .. و دة الأهم … ابدأ من دلوقتى و بلاش تأجل أى إنجاز أو فكرة ممكن تسعدك ، و ترفع من شأنك .
سابعاً .. خد النجاح قرار .
دمتم ف كامل القوة و الإرادة يا أبطال .
