مجرد تشابه أسماء
للكاتبه / هاميس جمال
من فترة وفقت قدام المرآيا و تأملت ملامحى بشدة و سألت نفسى كام سؤال و أكيد جوا كل واحد فينا نفس الأسئلة .
هو إنتى مين ؟
و إيه اللى غيرك كدة ؟
لسه فيكى شبه منى برغم إن ملامحك متغيرة عن زمان ؟
يا ترى عيونك اللى بقت شديدة ف نظرتها و حكمها على نفسى و على الغير !!
ولا قلبك اللى بقى قاسى على نفسك و على بعض البشر ؟
و لا نظرتك للحياة اختلفت عن زمان ؟
عارفين لاقيت الاجابه فين ؟؟؟
ف التغير !! و مين فينا متغيرش سواء للأحسن أو للأسوء !!
للقسوة أو للحنان ؟؟
زاد حكمة … أو العاطفة خدته لمكان بعيد عن نفسه ؟؟
و لا أتغيرت لشخص عملى جداً ، بعد ما كنت حنون و عطوف للمحيطين بيك ؟؟
تعالوا نتكلم شويه من القلب عن أسباب التغير و أهميته في حياتنا .
و نسأل نفسنا كام سؤال من القلب . هو إحنا ليه أصلا شخصيتنا بتتغير ؟؟
أولا يا عزيزى تعالى نعرف أن كلمة تغير بتتقال عن التحول من حال لحال تانى و أى مسار كنا ماشيين فيه و قررنا نستبدله بمسار تانى مختلف ! سواء تغير ف مسار الطريق أو أى مجال من مجالات الحياة .
و هل دة ينطبق على شخصيتنا ؟؟
ف الحقيقة آه طبعاً ينطبق على شخصيتنا و لكن أكيد ثم أكيد ليه أسبابه اللى هنعرفها سوا .
فمن أهم أسباب التغير ف شخصيتنا و دايما بيكون هو البطل الأساسي ف القصة و بلا منازع …
« الألم » كتير مننا بيتغير من الألم سواء النفسي أو حتى الجسدى .
فى مننا اللى الألم بيعلمة الصبر و الحكمة ف التصرفات المستقبليه و بيقدر ياخد قرارات حكيمة و مدروسة صح ، و فى اللى بيتعلم القسوة على نفسة و على المحيطين بيه و كأن حال قلبه بيقول ” عادى لما أكون قاسى على المحيطين بى ما انا كمان الدنيا قسيت عليا و داست كمان .
و فى اللى خد من التغيير اللى طرأ عليه « الصمود » قدام الدنيا و قرر يعيش قوى و شجاع ، و أن الإنهزام ملوش مكان جواه .
فى كمان اللى التغير زاد قلبه
« محبه و إحتواء » لكل المحيطين بيه ، لأنه زى ما جرب الوجع ف بيكون مش عايز يشوف قلب موجوع .
و فى كمان اللى قرر يكون
« الثبات » عنوانه ، بمعنى إنه مهما كانت لحظات ضعفة !! ف هتكون ليه هو و بس و مستحيل يظهرها للمحيطين بيه .
و فى اللى شاف إن التغير اللى طرأ عليه ف إنه أتعلم درس جديد من الحياة ، و لسه هيتعلم كمان .
و فى اللى لسه واقف قدام مرآيته و بيسأل نفسة … يا ترى أنا إتغيرت ؟؟
ف التغير يا عزيزى شئت أم أبيت هيحصل ف حياتك سواء على المستوى النفسي ، أو الجسدى ، أو حتى المستوى العاطفى .
و لكن هيفضل السؤال الأهم ….
هو أنا اتعلمت إيه من التغير ؟؟
و إيه هو الدرس اللى دنيا عايزة تعلمهولى ؟؟
ياريت نفهم و نتعلم قبل ما الدنيا تقول جملتها المشهورة
” إنتهى الدرس يا غبى ” و أنت لسه واقف مكانك لا حول لك ولا قوة .
نصيحة أخيرة …
خدها قاعدة ” ف التغيير قوة ” ف متخافش من التغير لأن معاه هتكون قوتك .
و لكــــــــ ن لسه هيفضل جوانا نفس السؤال !
ياترى أنا لسه بنفس ملامحى ، ولا تفضل مجرد تشابه أسماء .
أتمنى تكون خدت من التغير اللى طرأ عليك درس تتعلم منه ازاى تعيش الحياة اللى أن
ت عايزها … مش اللى ناس عايزها .
