الحب ما بين الحقيقة و الوهم
للكاتبه / هاميس جمال .
أكتر كذبة حلوة صدّقناها، وأصدق حقيقة محتاجينها
خلّينا نعترف
إن الحُب مش ملاك أبيض نازل من السما ، ولا أغنية رومانسية شغّالة طول الوقت …
الحُب ساعات بيبقى ارتباك و ساعات تانى بيكون وجع ، و ساعات إختبار صعب لقلبك ، و قوتها هتكون واقف بين مفترق طرق يا تكمل وانت بتتكسّر !!
يا تمشي وانت بتتعافى !!
الإختيار مازال بين إيدك .
فلك أن تتخيل يا عزيزى إن أكتر حاجة ضحكوا علينا بيها
إن الحُب لازم يوجع ، و أن الغيرة حُب ، و السيطرة خوف عليك .
والقهر بيكون “عشان خاطرك”
بس الحقيقة ، أن الحبيب اللي يوجعك كل يوم مش بيحبك !!
كل ما ف الأمر إنه متعوّد علي وجودك ليس إلا .
الحُب الحقيقي يا عزيزى مش هيخليك تشك في نفسك ،
ولا تسأل ” هو أنا قليل” ؟
يااااااه على الوجع اللى ف السؤال دة .
ولا يمكن ” المشكلة فيا”
أتأكد ….
إن الحُب اللي بجد هيخليك تحب نفسك أكتر .
في عيد الحُب …
الناس للأسف بتحتفل بالبدايات الحلوة .
لكن محدش بيحتفل بالنهايات الشجاعة.
محدش هيقول براڤو للي فارق علاقة كانت بتموته بالبطئ.
محدش هيطبطب على قلب قرر يختار السلام ، بدل اللهفة .
لازم تعرف إن الحب مش إنك تمسك في حد لمجرد إنك خايف تعيش لوحدك .
وقتها هقولك و كُلى ثقة إن الوحدة أرحم بكتير جداً من شخص بيجرحك بإسم الحب .
و من وجود شخص يحسسك إنك زيادة .
الحب إنك تبقى مع شخص
مش هيخليك تحارب عشان تثبت لنفسك إنك تستاهل تتحب .
أقسى حاجة في الحُب انه بيعرّي الناس ، ف يا هيطلع أجمل ما فيهم .
أو أوحش ما فيهم.
والذكاء الحقيقي مش إنك تحب
و لكن إنك تعرف ، إمتى تحب
و إمتى تفارق .
مش كل اللي قال “بحبك”
كان صادق و مش كل اللي ساكت
كان قاسي .
في ناس فارقت علشان ما تتأذيش أكتر و ناس كملت علشان مش قادرة تفارق .
يا عزيزى
الحُب مش وعد أبدي ، لكنه إختيار بيتجدد كل يوم .
ولو الاختيار ده بقى تقيل،
و بيوجع ، و بيكسّر !!! يبقى وقته انتهى .
دمتم فى كامل السعادة و الحب الحقيقي اللى يضيف لحياتك و قلبك قيمة و سلام .
