ملائكة تطاردها الثقوب
للكاتبه / هاميس جمال
فى جلسه هاديه مع ( ن ) ف العام تظهر انها شخصيه هادئه ، و لكن كان جواها بركان !!
ملامحها أقرب إلى الملائكة ، و صوتها عذب و ناعم ، إبتسامتها و كأنها حوريه من الجنه ، كلامها يدل على مدى ثقافتها و إحترامها لنفسها . و هنا أنا صممت أقولكم على هدوء ملامحها و شخصيتها لأننا هنعرف دلوقتى ليه كان جواها بركان .
و لكــــــــن فى البدايه …
هى قعدت على كرسي بعيد عنى و كأنها خايفة من حاجة ..
كان فى رعشة خوف و توتر ف كلامها و بدأت معايا بسؤال كان هو بداية رحله التعافى و هو !
أستاذة هاميس حضرتك شايفانى ؟؟
لأول وهله استغربت السؤال جداً و لكن جاوبتها اكيد طبعاً شيفاكِ .
قالت لى طيب ليه محدش شايفنى ؟
ليه جوايا خوف شديد و قلق مستمر ؟
تكلمنا كتير عن أسباب قلقها و عرفنا ليه هى قلقانه و سبب القلق العام اللى جواها … و مع الوقت أدركت ( ن ) أن مش كل حاجة في حياتنا تستحق مننا القلق الشديد دة .
و لكن يلا بينا سوا نروح لرحله بسيطة جوه مشاعر القلق و نحاول نفك طلاسمها مع بعض بهدؤء .
و علشان نعرف ايه هو القلق أصلا ؟
هو يا سيدى حاله إنفعالية داخليه تقدر تسميها فكرة صعب جداً السيطرة عليها بتملأ قلبك توتر و قلق غير واضح زى جرس إنذار بيصرخ جواك بصوت عالى ينبهك بقدوم خطر شديد و لكن مفيش حاجة ملموسه تقدر تشوفها قدامك أو تمسكها بإيدك .
و كأنك فى عالم من الخيوط المتشابكة و من الأفكار المرعبه مهما حاولت تقاوم و تفكها بتفضل مكلكعة فى بعضها .
طيب هو ايه الفرق بين شخص قادر يقاوم القلق و شخص تانى مستسلم ليه ؟
تعالى أقولك —
فى الحقيقة فى أنواع كتير من القلق هنتكلم عن كل نوع فيهم و أنت شوف وصلت لأى درجة منهم .
أول نوع و هو ما يعرف
• بالقلق العام ( إضطراب القلق العام ) .
و دة يا عزيزى قلق مستمر من غير أى أسباب محددة .
هتلاقى نفسك مثلاً قلقان من ( الشغل ، الصحة ، الأبناء ، المستقبل ، الزمن و الشيخوخة ) مع أن كلنا بنمر بنفس الأسباب اللى حضرتك بتمر بيها و لكن دائماً مريض القلق بيشوفها على أنها كارثة من كوارث الزمن .
نوع تانى من القلق و هو
• القلق الاجتماعى ( الرهاب الإجتماعى ) دة بقي بيخليك تخاف من الناس بمعنى أنك بتخاف من أنك تتكلم فى تجمعات مثلاً أو تخاف من رد فعل الناس عليك و نظرتهم ليك .
فلما تلاقى نفسك بتتجنب التواجد مع البشر أو بتخاف تتكلم وسط مجموعة ، أو بتخاف من الإحراج ، أعرف وقتها أنك فى مرحله الرهاب الإجتماعى و هقولك فى الآخر على طرق فعاله فى الشفاء منه بإذن الله .
ندخل لنوع تالت من القلق و دة صعب حقيقي إسمة ..
• ( نوبات الهلع ) .. أعراضة بتظهر فى
ـ سرعة ضربات شديدة ف القلب .
ـ حاسس إنك مخنوق من غير سبب حتى لو كنت ف مكان مفتوح .
ـ شعور إنك هتموت أو بتفقد السيطرة فى أمر ما .
و دة ممكن يظهر معاك فى وجود ( الفوبيا ) زى مثلا إنك تكون ف مكان عالى أو مقفول أو الخوف من حيوان معين .
• ( قلق ما بعد الصدمة ) من أسمة طبعا سهل جداً نكون عرفناه ، و هو أنك تكون إتعرضت لصدمة جامدة زى ( فقدان أو رحيل شخص غالى عليك ، حادثة ، صدمة نفسية شديدة ) .
أعراضه هتظهرلك على هيئه
١- كوابيس
٢- إسترجاع لذكرياتك المؤلمة
٣- هروب من أى ذكرى ممكن تفكرك بالصدمة .
• ( القلق الإنفصالى ) و دة يا عزيزى بيكون خوف من الفقدان ف إنك مش عايز تخسر شخص عزيز عليك ف بتضطر إنك تستحمل و تعدى حاجات كتير أكبر من طاقتك لمجرد إنك تكمل ف علاقة حتى لو كانت فى قمة الأذى النفسى و كمان الجسدى ليك .
و دة بطله الاساسي هو التعلق الزائد .
يلا بينا نبدأ رحله التعافى من القلق بأنواعه
فى البدايه لازم نفهم و نتأكد أن مشاعرنا مش زرار هندوس عليه الدنيا فجأة هتبقي وردى و لكن مع التمرين المستمر و الاصرار هنقدر نسيطر على شبح القلق .
أولا .. قبل ما تحارب القلق حاول تفهمه و تعرف أسبابه
هات ورقة و قلم و اكتب معايا أنت قلقان من ايه بالتحديد ، و أكتبهم على هيئه نقاط زى ( ١ ، ٢ ،٣ ، وهكذا ) .
ثانياً .. واجه الفكرة اللى مسببالك القلق بمعنى لو حصل كذا ( الفكرة المسيطرة عليك ) إيه هى النتائج المتوقع حدوثها و حاول تبعد عن أى فكرة سلبيه ، و استبدلها بفكرة إيجابيه على قد ما تقدر
ثالثاً .. متهربش من القلق و لكن قاومة و فى كل مرة قول لنفسك ( أنا كويس مفيش حاجة بتحصل ) ( مفيش حاجة تستدعى للخوف اللى جوايا )
رابعاً .. الفضفضة مفيدة جداً مع شخص أنت بتثق فيه و أنك تعلن قلقك مع متخصص هيكون مفيد جداً ليك .
خامساً .. نظم نومك و يومك و أعمل أى رياضة مفضلة ليك حتى لو كانت المشى لمدة بسيطة يومياً لأنها بتلعب على خلايا المخ و بتحسن التفكير جداً .
أتمنى يكون كلامنا سوا كان مفيد لكل قارء .
دمتم فى كامل السعادة النفسية و الحياتيه .
