اكرم الكراني يكتب: خمسة فن 📝🎨
يا لينا يا صوفيا…. مفيش حاجة جية علينا؟؟!! 🤔🤷♂️
في عالم “السوشيال ميديا” والـ “Reels” اللي بقى يسوق الفن زي سوق الجمعة، تظهر لنا معادلة غريبة جداً. طالعين بنسأل بكل براءة وحسن نية: يا لينا يا صوفيا.. مفيش حاجة جية علينا؟! يعني مفيش عمل فني يهز الشاشة؟ مفيش دور يثبت في الذاكرة؟ ولا الحكاية كلها بقت “لايك وشير” وضغطة زرار؟
الأزمة الحقيقية مش في الموهبة، الأزمة إن القوة الخارقة اللي بقت بتحرك سوق الفن دلوقتي هي الميديا والـ Social Media. الفنان مابقاش يقاس بحجم موهبته أو عمق أدائه، للاسف بقى بيقاس بعدد المتابعين ونسبة التفاعل على المنصات الرقمية. بقينا بنشوف نجومية مصنوعة بالكامل داخل “كادر” الموبايل، والجمهور الحقيقي قاعد بيتفرج ويسأل: “هو فين الفن؟!”.
الاعتماد الكامل على التريند والمحتوى السريع بيخلق حالة من الوهج المؤقت، لكن السينما والدراما الحقيقية محتاجة لعمق، محتاجة لورق وقلم، ومحتاجة لفنان يعيش الدور بجد مش بس يدور على زاوية الإضاءة اللي هتجيب “ريتش” أعلى.
يا جماعة الخير، الفن قيمة ممتدة، والتريند بيموت في 24 ساعة. نتمنى نشوف أدوار حقيقية ومشاريع فنية بجد ترجع للجمهور متعة المشاهدة، بدل ما نفضل واقفين مكاننا وبنتساءل: مفيش حاجة جية علينا؟!
