أربع صور للمرأة في أحلام الراجل
للكاتبه / هاميس جمال
(حواء – هيلينا – مريم – صوفيا)
عمرك سألت نفسك ليه كل راجل بينجذب لنوع معين من الستات؟
وليه راجل يشوف واحدة عادية جدًا بالنسبالك ويشوفها هي أجمل ست في الدنيا؟
الحقيقة إن كل واحد فينا جواه صورة معينة بيدور عليها، ويمكن الصورة دي تتغير مع الوقت على حسب تجاربه ونضجه ونظرته للحياة.
ومن هنا جت فكرة الأربع صور دول (حواء ، هيلينا ، مريم ، وصوفيا )
وطبعًا دول مش تصنيفات علمية، لكن مجرد رموز بتعبر عن أنواع مختلفة من الستات اللى ممكن الراجل ينجذب ليهم.
أولًا: حواء و دى ( تمثل الأم )
هى الست الحنينة بطبعها، اللي قلبها كبير وعطاها ملوش حدود.
هي اللي بتشيل، وتستحمل، وتسامح، وتهتم بكل اللي حواليها حتى لو على حساب نفسها.
الراجل معاها بيحس بالأمان والراحة، وكأنها البيت اللي بيرجعله بعد يوم طويل ومتعب.
وفي رجالة كتير بتنجذب للنوع ده من الستات لأنها بتدور على الاحتواء والرعاية أكتر من الشراكة الحقيقية .
بس المشكلة إن الست لما تفضل طول الوقت بتدي من غير ما تاخد، ممكن مع الوقت تتعب وتحس إنها شايلة العلاقة كلها لوحدها.
ثانيًا: هيلينا ( الأنوثة. الإنبهار ) طاغيه الجمال و الدلال .
هيلينا هي الست اللي أول ما تدخل مكان تلفت الأنظار بجمالها و جسدها .
عندها حضور وجاذبية وأنوثة تخلي الناس تفتكرها حتى بعد ما تمشي.
بتحب الحياة، وعندها طاقة وشغف، وعارفة قيمتها كويس.
الراجل غالبًا بينبهر بيها من أول لحظة، ويمكن ينجذب ليها بسبب جمالها أو سحر شخصيتها …
لكن أوقات كتير المشكلة بتكون إن بعض الرجالة بيشوفوا الصورة الخارجية بس، وينسوا إن ورا الجمال ده إنسانة عندها عقل ومشاعر وأحلام.
ولما العلاقة تتبني على الإنبهار بس، بيبدأ البريق الأول يهدى، ويكتشف الطرفين إن الجمال لوحده مش كفاية عشان يبني حياة كاملة.
ثالثًا: مريم ( السكينه و راحة الروح )
مريم هي الست الهادية اللي حضورها بيريّح القلب.
الراجل معاها بيحب روحها قبل أي حاجة تانية، وبيستمتع بكلامها وقربها وتفاهمها.
هي رمز للود والاحتواء النفسي والراحة اللي بنحس بيها مع شخص فاهمنا من غير كلام كتير.
وجودها بيخلي العلاقة أبسط وأهدى، مبنية على الاحترام والمودة والتقدير.
رابعًا: صوفيا ( الحكمة و الشخصية المتوازنة )
وصوفيا معناها الحكمة.
وهي الست اللي قدرت توازن بين قلبها وعقلها.
عندها أنوثة من غير ضعف، وقوة من غير قسوة.
بتعرف تحب بصدق، وفي نفس الوقت تعرف تحط حدود لأي حد يحاول يتجاوزها.
الكلام معاها ممتع، ورأيها له قيمة، وسند وقت الشدة.
هي مش كاملة، لأن مفيش إنسان كامل، لكنها عارفة نفسها كويس، وعارفة إمتى تتمسك وإمتى تسيب، وإمتى تتكلم وإمتى تسكت ، و عارفة قيمة نفسها كويس جداً من غير غرور أو كبرياء .
عشان كده كتير من الرجالة بيشوفوا فيها الشريكة اللي يقدروا يكملوا معاها مشوار الحياة.
طيب الراجل بيختار على أي أساس؟
الحقيقة إن كل راجل بيختار على حسب احتياجاته ونضجه النفسي ونظرته للحياة.
فيه اللي بيدور على حواء واحتوائها زى الأم.
وفيه اللي بيجري ورا هيلينا وإنبهاره بيها .
وفيه اللي بيدور على مريم وراحة الروح معاها.
وفيه اللي بيتمنى يلاقي صوفيا بحكمتها وتوازنها.
ويمكن الحقيقة إن كل واحدة من الصور دي موجودة جوانا بدرجات مختلفة.
ودلوقتي السؤال ليك…
إنت كراجل بتنجذب لأي صورة من الصور دي؟
وإنتِ كإمراءة شايفة نفسك أقرب لمين فيهم؟
الإجابة أكيد جوا كل واحد فينا.
دمتم بخير أعزائي القراء .
