كلمة كبيرة أوي وشاملة أوي وفي رأيي الشخصي ما تتقالش لأي حد.. بمعني علشان إنسان يتقال عليه هههه زعيم لازم يكون عمل حاجات كتيرة أوي أفادت بلده وشعبه علشان يستحق يطلق عليه هذه الصفة..
عمل إيه بقي عادل أمام لكي يستحق هذا اللقب ؟
أنا بقي أقولكم :
– عمل مسرحية مدرسة المشاغبين اللي ضيعت جيل بأكمله (أنا من الجيل ده) وكانت بداية الإسفاف والإنحدار الأخلاقي وظهور الألفاظ الخارجة والإيحائات الجنسية لأول مرة علي خشبة المسرح والتلفزيون ( اللي كان بيضحكني فيها سعيد صالح)
– عمل مسرحية شاهد ما شافش حاجة اللي كانت بداية للتريقة علي القضاء..
– عمل بعدهم كام مسرحية يجيب فيهم ممثلين ملاكي علشان يتريق عليهم بمنتهي ثقل الظل ويضحك عليهم الجمهور.. أي كوميديا الموقف مثل كوميديا نجيب الريحاني وفؤاد المهندس وإسماعيل ياسين ؟!!
– عمل أفلام مقاولات بالجملة مثل رجب فوق صفيح ساخن وعصابة حمادة وتوتو ورمضان فوق البركان وشعبان تحت الصفر وخلافه..
– عمل مسلسلات وهمية زي عفاريت عدلي علام وفرقة ناجي عطالله اللي انا كنت فاكره برنامج الكاميرا الخفية..
– بلانا بولديه بالعافية واحد مخرج ما نجحلهوش فيلم والتاني ممثل مالوش فيها خالص يستعمل أسم أبوه ويلم حوله كام ممثل دمهم خفيف بيضحكوا الناس وياخد هو السوكسيه..
عادل إمام يا سادة ليس أكثر من ممثل مجتهد وزكي جدا يحيط نفسه بمجموعة من المثقفين والصحفيين والإعلاميين ليلمعوه ويكتبوا عنه ما ليس فيه..
الزعيم له مواصفات كثيرة جدا لا توجد صفة واحدة من هذه الصفات فيه
– الزعيم لازم يكون متواضع.. مش فيه
– الزعيم لازم يكون صادق.. مش فيه
– الزعيم لازم ذو أخلاق عاليه.. مش فيه
– الزعيم لازم يحب الخير الناس.. مش فيه
– الزعيم لازم يكون كريم ونزيه.. مش فيه
هل تعلموا أن عادل إمام مالوش ولا فيلم في أعظم 100 فيلم في ذاكرة السينما المصرية..
هل تعلموا إن عادل إمام ماحضرش جنازة محمود عبد العزيز لأنه مش قادر ينسي إنه عمل مكانه رأفت الهجان والذي أصبح من أنجح مسلسلات الدراما التلفزيونية علي الإطلاق ومازال يعرض إلي الأن في حين أن جمعه الشوان طواه النسيان..
هل تعلموا انه ماحضرش جنازة احمد زكي أقوي (مشخصاتي) في السينما المصرية منذ إختراعها إلي الأن ( نعم احمد زكي مشخصاتي وليس ممثل لأنه بيشخص الشخصية اللي كاتبها الكاتب واللي عايزها المخرج ويكفي أحمد زكي فخرا أنه عندما سألت صفاء أبو السعود الرائعة سناء جميل عنه قالت هذا الممثل أنا أنحني له ولما سألتها عن عادل أمام كان ردها ده راجل بتاع الوزرا)
وطبع لم يحضر الجنازة حقدا عليه وكرها له..
مافيش زعيم ابدا صاحب كأس ويدخن مخدرات..
عادل أمام ليس له مبدأ فأبو زوج أبنته من كوادر الأخوان وكان مع مبارك ثم أصبح مع أحداث يناير ثم بقي مع الإخوان ثم بقي مع ثورة 30/6
( راجعوا أحاديثه مع عمرو أديب علي اليوتيوب)
طبعا كفايه كده لأني لو كتبت عنه وعن سلبياته عايز أكتب مجلدات مش بوست علي الفيسبوك..
وأخيرا وتأكيدا لكلامي بأن اللي مخليه زعيم إعلام العار اللي كان بيباركله علي أي مسلسل بيعمله رغم تدني نسبة المشاهدة..
وعلي فكرة ماحدش يقولي انه حارب الإرهاب علي المسرح في أسيوط لأن كان نصف المتواجدين في المسرح شرطة والنصف الأخر متنقين بالواحد واللي حارب الإرهاب في أفلامه قلم وحيد حامد..
وأخيرا و تأكيدا علي ذكائه أنه مازال هو رقم واحد في مصر وأعلي أجر علي كل هذه السلبيات وطبعا ده بسبب طيبة شعبنا.. مين يقول إنه يطلع بطل مسلسل بيمثل نصه وهو قاعد بعد بلوغه من العمر أرذله وياخد 40 مليون جنيه وياريته مسلسل كوميدي أو حتي بيقول رسالة كله هجس لا قصة ولا سيناريو ولا إخراج مش بقولكم شعبنا طيب..
فأين هو من أحمد زكي والفخراني ومحمود مرسي والسعدني ونور الشريف ومحمود عبد العزيز..
أين أفلامه من أيام السادات وناصر 56 وأرض الخوف والغيرة القاتلة وزوجة رجل مهم والكيت كات والصعلوقان والخائنة والعار وجري الوحوش..
أين مسلسلاته من ليالي الحلمية ورأفت الهجان والعصفور والنار وأرابيسك وعائلة الحاج متولي والدالي والخواجة عبد القادر والعائلة..
أين مسرحياته من سيدتي الجميلة وحواء الساعة 12 وأنا وهو وهي وإلا خمسة والمحروسة وسكة السلامة وحالة حب ولو كنت حليوة..
“وطبعا كل ما سبق علي سبيل المثال لا الحصر”
عفوا عادل إمام الكلمة دي كبيرة وواسعة أوي عليك ولو في حد يستحقها فهو أحمد زكي عند جدارة،
ولو مسمينك الزعيم نسبة لمسرحيتك السخيفة فأنا من حقي أسميك الهلفوت نسبة لفيلمك الرخم..
فهل بعد كل هذا يستحق لقب زعيم الذي أطلق علي سعد زغلول ومصطفي النحاس والسادات ؟!!
