عندما تتحدث مشاعر الرجال
للكاتبه / هاميس جمال .
— مالك ؟
+ مفيش !!
— أنت لسه بتحبنى ؟
+ صمت و سكوت رهيـــــــب
— أفهم من سكوتك أنك مش عايزنى ف حياتك تانى ؟
+ أنا محتاج أكون لوحدى دلوقتى !!
+ محتاج أبعد شويه ، و أسكت .
جرى على أوضته ، و هو جواه نار مش عارف يطفيها ، و ولع سجارته و نفخ فيها بكل قوته ، و كأن جواه بركان رهيب كان محتاج يخرج من قلبه مع كل نفس خارج من السيجارة !
و بدأت جواه رحله الصراع الرهيبه .
هو أنا ليه وقفت ساكت قدامها ؟
ليه ماصرحتهاش بأنى محتاج أبعد و أرتب من تانى نفسى ! محتاج أفهم مشاعرى .
نام على سريره و غمض عيونه بكل قوة و كأنه مش عايز يشوف نفسة ، و هو مهزوم كدة قدامها .
و دى هى رحلتنا النهاردة اللى هتكون فى نفس أعماق الرجال اللى متعودتش إنها تصارح نفسها بمشاعرها .
و نرجع تانى لبطل حكايتنا و نعرف هو سكت ليه من البدايه و يا ترى دة كان هروب ؟ ولا سكوت ؟
و هنا هنعرف أن سكوته مكنش ضعف و لا هو هروب و لكن كان محتاج يفهم نفسة ، و يقرر يفهم مشاعرة صح لأول مرة في حياته .
حقيقي كل الإعتذار للرجل اللى من نعومة أظافرة و هو إتعود يسمع كلمات كانت فى الحقيقة بمثابه صدمات الطفوله بالنسبه له ..
من بدايه ما كان طفل فى سنين عمره الأولى و أول مرة يجرى على أمه و هو يبكى و إتقاله أنت راجل و الرجل ( ميبكيش ) ! و مع إنه مش فاهم الجمله وقتها ، لكنه مسح دموعه و قرر برغم طفولته البريئه ، إنه يكبت مشاعره لحد ما كبر شويه كمان ف مرحله المراهقة و الطلب مش بس ميبكيش لأ دة كمان بقي ( كن سند لإخواتك البنات و خلى بالك منهم ) و إتكررت على سماعة جمله ( أنت راجل البيت ) و لسان حاله بيسأل طيب أنا مين يسندنى ؟
و دخل بطلنا الهمام فى مرحله تانيه و أصعب و هو إنه يكون سند لغيرة ..
و كبر كمان رجلنا الغالى و بدأت حياته العمليه تخطوا خطواتها و بدأ مرحله تالته وهى العمل و قالته من اول يوم فيه ( متشتكيش ) أكتم مشاعرك و دموعك جواك و استحمل غلاسة و عجرفة المدير و زمايلك و انت ساكت و حذارى التعبير عنها بأى شكل من الأشكال ، و إلا هيتقال عليك ضعيف !! هى وصلت لكدة كمان ؟ فى الحقيقة اه وصلت لكدة .
و ما إدراك عمق الكلمة دى على أى راجل و على قوته النفسية .
حقيقي فى مجتمعنا بقى مطلوب من الرجل التظاهر
بالقوة — برغم إحساسه بالضعف .
الصمت — وقت إحتياجه الكلام .
الشدة — برغم إحتياجه للإحتواء .
المسؤليه — وقت إحتياحه للسند .
كلها مشاعر مكتوب عليها غير قابله للظهور و ظلت فى طى النسيان لأى رجل يفكر يظهرها لأنه متأكد أنها مشاعر ملهاش مكان جوه عالم الرجال ، و الكل يطالبه دايما بالقوة و الثبات .
و هنا دخل الرجل المميز فى مرحله كانت بالنسباله هى الأكثر راحة و أمان ، إلا وهى الصمت و الكتمان و الظهور بقناع اللامبالاة ، و لكن قبل ما نتهمة بالأتهامات دى كلها محتاجين نعرف و نفهم هو ليه أصلا أختار الصمت بدل من الكلام … وليه وجد فى السكوت راحته ؟
فى الحقيقة الراجل يبفضل الصمت عن الكلام ؟ و دة اللى هنعرفة سوا حالاً من خلال انواع صمت الرجل ..
• صمت الرجل فى الحقيقة مش ضعف أبداً زى ما فى ناس فهماه و لكن بيكون محاوله منه ( لفهم أعماق مشاعره ) ، و أنه بيحب ياخد وقت كافى فى تفسير و دارسة أى مشكله يتعرض ليها ، و هنا صمته ممكن يتفهم أنه ضعف ، و لكنه فى الحقيقة هو دراسه حاله زى ما بيقولوا.
• نوع تانى من الصمت كمان بيكون (خوف ) من خسارة حد هو بيحبه و عارف أنه لو أتكلم هيكون عصبى و أن الغضب اللى جواه هيكون هو ملك الحوار بدل من الحكمة و العقل و هنا بيكون الصمت و السكوت حكمة و قمة المحبه للطرف الآخر ، مش تقليل منه أبداً ولا إحتقار للمشاعر .
• صمت تالت مهم و دة بيكون على هيئه ( إنسحاب) و حقيقة أنا بشوفها قمة النضج ، لأن الرجل هنا بينسحب مش بسبب ضعف أو قله حيله منه ، و لكن لأنه حابب يفكر بأسلوب منطقى أكتر منه عاطفى ، و دة لأن طبيعة عقل الرجل بيكون التفكير العقلاني مش العاطفى هو سيد الموقف مش زى الستات .
• نوع كمان من الصمت بيكون على هيئه ( الفراغ ) هو ف الوقت دة محتاج بس أنه يكون ساكت من غير أى حوار و من غير إتهام بأنه فى حاله من اللامبالاه ، لأنه فعلاً كل اللى محتاجة ف الوقت دة إنه يفصل من ( الشغل ، المسؤوليه ، الضغط النفسى ، البيت ، و حاجات كتير تانى جواه ) هو بس اللى عايشها .
ف لما تلاقى الرجل ف حاله سكوت و صمت تام و هو معاكى ، أتأكدى أن عقله و تفكيرة شايلين أكتر من المحتمل لينا إحنا كستات .
تعالوا سوا كدة نتعلم إزاى نتعامل مع المشاعر اللى كل رجل مخبيها جواه و رافض الإعتراف بيها .
و لكل أنثى علشان هى كمان تفهم الراجل بيفكر إزاى .
١- حدد مشاعرك و أعترف بيها قدام نفسك قبل اى حد .
٢- من حقك تبكى لوحدك أو قدام شخص انت تثق فيه و تفرغ مشاعر الكبت اللى جواك لو حتى على هيئه كتابه ( هتفرق معاك كتير )
٣- تناقش فى كل مشكله مضايقاك و بلاش هروب منها و حاول تحطها على هيئه نقاط من الأهم إلى الأقل أهمية .
٤- خدها قاعدة ( أنت مش آله ) أخرج يوم فى الأسبوع لأى مكان بتحبه و بترتاح فيه علشان تفرغ أى طاقة غضب أو حزن جواك .
٥- كلم أحبابك و قولهم إنك بتحبهم و بلاش كبت مشاعرك للمرة التانيه .
٦- عبر عن رأيك بكل أريحية من غير إنسحاب أو قلق من رد فعل الناس .
• و نصيحتى ليكى يا ست الكل
١- لما تلاقيه ساكت حاولى تسبيه و هو لوحدة هيهدى و يرجع تانى يتكلم معاكى .
٢- لما تحكى ليه عن مشكله هتلاقيه يساعدك بحلها مباشرة برغم إنك مش محتاجة أكتر من حضن و طبطبة و لكن هى دى طريقته لإحتوائك ، ف إفهميه و أشكريه على محاولاته .
٣- الرجل بطبعة عاشق للتقدير ، فقدرى تعبه و مجهودة علشانك و علشان بيته و أولادة .
٤- الرجل صدقينى جواه طفل صغير محتاج جداً للدعم و الكلمة الحلوة طول الوقت .
دمتم فى كامل السعادة كل قرائى الأعزاء
