من أهم المشاعر اللى من حقك على نفسك إحترامها بشدة هى مشاعر الحزن و الألم اللى بيمر بيها قلبك .
من حقك تأخد وقتك الكافى ف الإحساس بيها ، و من حقك كمان تقدرها .
لكن … إحنا لية بنحزن ؟
كل مشاعر تخالف توقعاتنا بالسعادة ممكن تسببنا الحزن .
زى فقدان شخص غالى أو مال أو وظيفة …دى كمان تسبب لينا حزن .
و لكن أصعب شعور ممكن تحس بيه هو حزنك على نفسك و على طموحاتك و رغباتك ، و تحس إنك جوة دائرة مش عارف تخرج منها ، أو إنك مازالت واقف ع السلم لا قادر تكمل و تطلع … ولا قادر تنسحب و تنزل .
و بيدأ إحساسك بالفشل و الإحباط يحاوط قارب حياتك من كل إتجاه ، و تهددك أموج الحزن بكسر قارب نجاتك
و إنت موهوم إنك للأسف لا حول ليك ولا قوة .
و لكن دة أكبر خدعة من الخدع النفسية الشريرة اللى ممكن عقلك يخدعك بيها و بيدأ يصورلك أد اية الدنيا سودا و إن مهما عملت مش هتلاقى حل .
لكن ثق إن لكل مشكله حل … و لكل مشاعر حزينه تعافى .
هل بقى في مراحل للتعافى ؟
اكيد التعافى موجود بشوية خطوات بسيطة تقدر تتعافى من الحزن و تطردة من قلبك ، مش هقدر أقولك طرد دائم لأننا بشر و دى مشاعر طبيعى جداً أننا نشعر بيها زيها زى الفرح و الخوف و القلق و الأمل كمان
كلها مشاعر ليها حق علينا .
نبدأ بقى برحله التعافى … يلا بينا نركب قطار التعافى و نبدأ بأول محطة لكن اوعدنى إنك تستمتع برحله التعافى من حزنك .
أول محطة .
و هى إحترامة و إنه يأخد وقته ( يوم .. اتنين .. أسبوع) حاول المدة ما تطولش اكتر من كدة علشان متدخلش ف مرحلة إكتئاب نفسى و يبقى العلاج صعب .
تانى محطه .
وهى جلسة صريحة جداً مع الذات …أدخل جوة أعماق قلبك و صارحها بكل اللى تعبك و سببلك الحزن من أى مجاملات و لا تزيين للوجع .
تالت محطة .
الفضفضة و عدم الكتمان … حاول تفضفض لشخص قريب من قلبك أو متخصص نفسى و إتكلم عن أسباب حزنك و مشاعرك بكل جدية لأن زى ما قلتلك م البداية ( الحزن مشاعر لابد أن تحترم )
رابع محطه
وهى الحل …
قدم لنفسك أو بمساعدة حد متخصص زى ما قلتلك قبل كدة أو صديق مخلص ليك ، حلول لكل أسباب الحزن
إن كان مشاكل ارتباط أو وظيفة و أتأكد أن مفيش مشكله ملهاش حل .
طيب لو فعلا سبب الحزن ملوش حل زى ( مرض صعب الشفاء منه أو رحيل شخص غالى ) يبقى الحل الأساسي هو ( الرضا بما كتبة الله لك من بداية ما خلقك ) و أتأكد كمان إن الرضا سر من أسرار السعادة و البعد عن الحزن .
ف الآخر هقولكم تمرين بسيط للابتعاد عن اسباب الحزن
( الجلوس ف مكان هادئ و غمض عيونك و حاول تعمل شيهيق و زفير بهدوء
دلوقتى تخيل معايا كل اسباب الحزن مهما كانت جواك و كأنها فقاعات و مع كل فقاعة ( مشكله ) انظر ليها بأبتسامة هادية و فرقعها … أيوة فرقعها و قولها ملكيش جوايا مكان .
او شوف مشاكلك و كأنها سحاب مع ما سحابه حزن نسمة هوا رقيقة جاية من عند ربك ليك انت و أطلب منها تبعد حزنك عنك
تمرين تانى
أكتب كل اللى أتسبب ف حزنك ف ورقة و قوم أحرقها و قول لمشاكلك ( نار قوتى هتحرق كل حزن جوايا )
و أخيراً …
فى قانون حقيقي اسمة ( قانون الجذب)
و دة معناه ببساطة إن كل ما تفكر فيه يظهر على أرض الواقع ف حياتك سواء كان حزن أو فرح … تحقيق أحلام أو إحباط
فكل ما نفكر به يحدث لنا … و تأكد يا صديقي شئت أم أبيت إن ( حياتك هى نتاج أفكارك ) .
و أخيراً فمر ف السعادة … تسعد .
دمتم في ملئ السعادة النفسية و الاجتماعية و الروحية .
