اسرار النفس بقلم / هاميس جمال

اسرار النفس

بقلم / هاميس جمال

لكل إنسان مفتاح علشان تقدر تتعايش معاه و تعرف تدخل قلبه بسهوله .
مجرد مشاعر بسيطة تقدمها للاخر هتلاقى كل الحب يتقدم ليك … دة كمان هيسلملك قلبه و حياته على طبق من دهب .
اولا :- التقدير —-
“شكراً ” ” كتر خيرك على تعبك ” “أنا واثق إنك هتقدر تنفذ المطلوب منك ” ” أنت إنسان رائع ” ……. ألخ
كلها كلمات من الدعم و التقدير المهمين جداً لكسب اى شخص .
كلنا بنحتاج اللى يقدر مجهودنا و يحس بتعبنا مهما كان بسيط . بنستنا كلمة حلوة نقدر نكمل بيها يومنا و مشوار حياتنا مهما كانت الكلمة دى بسيطة .
لكن حقيقى بيكون ليها مفعول السحر أننا نقوم و ننحت ف الصخر من أول و جديد .
أنت تقدر تسحر نفوس الأشخاص ببث روح الحماس و التشجيع المستمر ليهم ، و كلمات الاطراء المستمر .
أتعلم « تدعم … تشكر … بث روح الحماس » .
ثانياً :- الإهتمام —-
إختلقنا عشاق للاهتمام ، بنحب اللى بيهتم بينا و يسأل علينا .
ف الأهتمام يولد فوق العشق عشقاً أخر .
إبعت رساله لأحبابك قول فيها ” وحشتنى ” ..
” كنت محتاج أسمع صوتك ” .. ” طمنى عليك ”
كلمات برغم بساطتها إلا أنها كفيله جداً أنك تأثر بيها فقلوب الناس .
ثالثاً :- إسمعهم —-
وسط مشاكل وهموم حياتنا بنحتاج لحد يسمعنا و نرمى علية حمولنا و لو بمجرد فضفضة بسيطة .
محتاجين الإيد اللى تطبطب علينا و تسمع شكوانا و آنين أوجاعنا .
” خليك منصت جيد لكل اللى محتاج يفضفض”
” خليك كمان الإيد اللى تطبطب على كل نفس محتجالك ” .
رابعاً و الأهم :- قدم حب —-
قدم دايماً الحب و السلام للغير ، إبتسم لكل شخص يقابلك و اتأكد أن المشاعر اللى أكيد هترجعلك أضعاف هى تقديم الحب ، مهما كان الآخر لا يستحق … ثق إن هيظهر الشخص اللى يستحق محبتك و قلبك و مشاعرك الفياضة بالحب و التقدير .
قانون الكارمة بيقول إن كل ماتقدمة للغير يرد إليك بنفس الطريقة .
مجرد مشاعر بسيطة لو قدمناها للغير بكل أمانه … ثقوا إننا هنأثر ف قلوب بعض بالخير و الحب و السلام .
و كلمة أخيرة خليها قدامك دايماً
” علشان تعيش ف سلام … كن أنت صانع للسلام ” .