أو ليس فيكم رجل رشيد ؟؟!!!!

بعيدا عن حزب أو فصيل أو قيم ما
وبعيدا عن جرأة الأفكار وبعيدا عن تقييم لعمل درامى بعينه عندى سؤال
هى ليه حرية الإبداع مرادفها التدنى والإنحدار ؟؟!!!
زمان كان فيه افكار جريئة لكن الصورة السينمائية كانت اقدر علي التعبير المؤثر يعنى
مثلا لو كان فيه مشهد المفروض فيه أغتصاب أو ماشابه كان يجيبلك شمعه بتطفى شباك بيتكسر أو مؤثرات صوتية لذئب مثلا فاانت تفهم ايه اللي حصل من غير مايجرح مشاعرك أو عينك أو يخدش حياءك
كمان حرية التعبير ليه معناها جرأة المشاهد والألفاظ الصادمة والخادشه
يعنى معقول رغم إن ولادى كبار مااقدرش اقعد وسطهم واتفرج على مشاهد تمس إهدار القيم وتخدش الحياء !!!!

الإبداع معنى إيجابي وراقى ليه بنحوله لقيمة سلبيه
عبر عن فكرتك ماعندناش مشكلة بس ماتعملش زلزال وتلوث فطرة الناس اللي فطرت علي الخير والنقاء بحجة أن الدنيا بتتغير واحنا لازم نواجه مشاكلنا وأن ده واقع وبنعبر عنه …. لا حضرتك ماتحاولش تقنعنى ان هذا الكم من الإنحطاط فن وقيمة إبداعية … ماتحاولش تقنعنى ان حد يطلع علي المسرح يتنطط زى القرد وسط أجواء صاخبة وهو بيردد كلام فاقد الدلالة اللفظية والمعنوية إن ده فن جدير بالمتابعة والتشجيع ..

معروف ان من المبادئ الأساسية ف الحياه أن الخير والحق والعدل والجمال قيم سامية تدعم التواصل الإنسانى علي كل مستوياته فيتحقق التوازن النفسي للإنسان ف منظومة الحياه
الذوق العام طفل عفى مكتمل النمو والنضج ينضح بالجمال ليه نحوله لطفل مشوه ومخوخ وفاقد للأهلية

احنا ناس دارسين وفاهمين يعنى ايه فكر ابداعى فميجيش واحد اهطل متخلف يحاول يقنعنا أن الإبداع حاجة تانية ضد فطرتنا الإنسانية
وده مش إنكار لوجود نماذج سلبية بتضرب بالقيم والأخلاق والمبادئ عرض الحائط فى المجتمع
بس الموضوع نسبة وتناسب وانت بتقدم فكرك ده لجمهور ممكن يرفضه وده حقه مش لما يرفضه تهاجمه وتتهمه إنه فاقد للوعى وقيم التحضر

يبقى لازم نعترف ان المشكله فى عدم إدراك القيم
المفروض أى فكرة تقرر إخراجها فى عمل سينمائي او تليفزيونى بيتم عمل معالجة دراميه لها تضمن سلامة وصول الفكرة بدون مبالغه أو تشويش ومراعاة التسلسل المنطقى للأحداث والأشخاص وتطور مشاعرهم وردود أفعالهم تجاه بعضهم وتجاه أنفسهم
كمان صياغة الحبكة بتتطلب تصاعد درامى متسق مع طبيعة قناعات ووجدان وواقع المتلقي اللى انت بتستهدفه بتقديم العمل

فاتباع اسلوب الصدمة والصدام مع رفض أو قبول المتلقي بيخلق حالة من الجدل العقيم
بدون اى نتائج إيجابية تفيد الطرفين
إحنا مش حنقول الفن رساله أو يخضع لمعايير ومبادئ دينيه واخلاقية ولو انه مش عيب أننا نراعي ربنا فيما نقدمه
لكن بنقول أنه بيخضع لمعايير الإبداع والرقى وقيم الخير والعدل والجمال
حتى لو بتناقش سلبيات معينه لازم تتصاغ فى طرح لايثير الاشمئزاز ولكن يقدم النتيجة والحل المرضى لفطرة الإنسان وقيمه الإنسانية
لكن تخلى كل القيم السلبية فى عمل واحد يفقدك الإحساس والرؤية الواقعية الواعيه ويهد كل معانى الخير جواك ويفقدك الثقة ان فيه حاجة كويسة ممكن تورثها لولادك وتطمن عليهم وعلى صياغة شخصيتهم وتشكيل وعيهم بشكل سوى
ليه الاصرار على اثارة الجدل وخلق جو خانق من الجدل العقيم وتبرير الخطأ واستحلال الحرام وانتهاك القيم وافساد الذوق
او ليس فيكم رجل رشيد ؟؟!!!!!!!!!!!