التعافى من العلاقات السامة بقلم / هاميس جمال

و مين فينا مدخلش فى علاقة سامة واحدة او أتنين على الأقل .
علاقة واحدة دمرت جواك قيم و مبادئ كنت متوقعها من اللى حواليك لمجرد أنك أتربيت عليها .
علاقة سامة واحد هدت فيك كيانك و بعد ما كنت شايف نفسك ف العالى ، فجأة من الاحباط و خيبه الأمل اللى اتعرضتلها ، نزلت لأسافل الأرض .
ايه هو بقى تعرف العلاقات السامة …
العلاقة السامة بإختصار :-
هى كل شخصية دخلت حياتك وهى مقرره تدمرك و تستنزف فيك كل الطاقات الإيجابية و تحولك ل “أشباه بشر” و ” حطام إنسان ”
يا ساتر !!! هو ممكن تكون في شخصيات كدة ؟؟؟
أحب اقولك اه فيه و كتير جداً حواليك كمان !!
دول ممكن يكونوا معاك جوه بيتك !!
وعلشان محدش يقولى أنى ببالغ ف كلامى تعالوا نقول سوا كدة مين هما الشخصيات السامة اللى حلفت عليك وعلى نفسك بالدمار و أمتصاص كل طاقاتك الإيجابية .
١- و اللى متربع على عرش الشخصيات السامة و الغنى عن التعريف « النرجسى » باشا و انا اتكلمت عليه بإستفاضة ف المقال اللى فات ف مش هتكلم عنه تانى ف المقال دة .
٢- المتسلط سواء ” ذكر او أنثى ” اللى متحكم ف كل كبيرة و صغيرة ف حياتك ، و اللى دنيتك معاه كلها ممنوعات ( ممنوع تخرج من غير هو اللى يقرر دة _ ممنوع تختار لبسك _ بيتك _ أصحابك _ دراستك _ تزور حتى أصحابك أو اهلك ) يا عزيزى دة أنت حتى ممنوع تتنفس غير بقرار منه .
٣- الأنانى .. اللى طول الوقت بياخد و بس ! بياخد منك ( وقتك – مجهودك ف شغلك _ صحتك لانه مستخسر يتعب نفسة ) الشخصية دى عمرها ما هتشبع مهما قدمتلها و ف الآخر ثق إنك مش هتسمع غير جمله ( هو انت عملت ايه زيادة !! انت مقدمتش غير العادى ) و طبعا
” هنا كانت الصدمة بالنسبالك ” و تدخل ف دايرة بعد كل اللى قدمته دة ( مفيش شكراً مفيش ميرسى) .
٤- الكداب و المراوغ .. لأنك دايما هتكون فى حاله شك ف كلامة و تصرفاته و هتتمنى لو تتحول بقدرة قادرة للمفتش كورمبو علشان تقدر تكتشف كدبه و مراوغته اللى هو بطبعة أستاذ فيهم .
٥- المتلاعب بالمشاعر .. انت بين أيديه حرفياً زى لعبه ” اليويو ” بيعرف يقربك و يبعدك وقت ما هو يقرر .
فجأة انت روحه و نور عينيه و ياخدك و يطلع بيك لسابع سما ، و يقوم هووووب رميك لسابع أرض بكل قوته و انت يا غلبان الى الان مش عارف تفوق من الصدمة ولا قادر تحدد مشاعره من ناحيتك ( بيحبك ولا بيكرهك )
٦- المضطهد دايما فى رواية أحدهم ، أو ( دور الضحية ) ( الدراما كوين ) … دة بقي دايما مظلوم و الدنيا جايه عليه و يوم ما تفكر انت يا مسكين تجمعله اى حل فثق ثم ثق أن كل حلولك مرفوضة معاة .
٧- الناقد .. أنت فاشل ف نظرة فى كل حاجة ( تفكيرك مش مضبوط _ شكلك مش متناسق _ شغلك ناقص _ ذوقك محتاج يتغير و يتحسن ) شخصية بتكبر و تترعرع ع نقد الغير لأى سبب و لكل سبب .
بعد كل الشخصيات المتعبة دى اللى زى ما قلت اكيد اتعرضنا لشخصية أو اكتر ف حياتنا و اية المشاعر السلبيه اللى بتتسحب زى الحرامى و تدخل تدمرنا ؟؟؟
اولا إحساس الإنكار :-
و لسان حالك لسة مش مصدق أن يتعمل فيك كدة و تفضل تطول ايامك تجمع حجج و اعذار للشخصية السامة على كل تصرفاتها معاك ، مش بعيد تلوم نفسك بأنك السبب ف أى مشاكل تحصل بينكم ، و بسببها تضعف شخصيتك و ثقتك بنفسك
تنعدم .
ثانياً الحزن العميق :- و الندم الغير مبرر على اغلب تصرفاتك و على نيتك اللى كانت صافية ف المعامله ، و كأنك الجانى و المجرم ف حق علاقتكم اللى أصلا أنت كنت داخلها بسلامة نواياك .
ثالثاً الخوف من دخولك اى علاقة :- حتى لو متأكد من نجاحها تحت شعار ( أنا ممكن أتأذى تانى ف خلينى بعيد ) .
يلا بقي نتعالج من كم العك اللى حصل دة و نتعافى …
اول حاجة للتعافى هو ….
١- القرار بالانسحاب و التخلى عن العلاقة السامه مهما كانت ليها مشاعر أو ذكريات حلوة جواك .. و ياريت تتأكد ان الذكريات الحلوة دى جواك انت و بس ، لان لو السام حبك مستحيل كان يفكر ف آذيتك .
٢- انهيار و إنك تعطى للحزن مساحة جواك ، متكتمش زعلك ولا دموعك و أتأكد إن ندمك ع العلاقة الفاشلة ما هو إلا درس علشان تعرف تختار بعد كدة .
بعد الانهيار و خلصنا بقي دموعنا و صرخنا على اللى فات ، يلا بقى نتعلم نختار ،،
٣- الاختيار …بس المرة دى خلى قدامك كل الذكريات المؤلمة مع الشخصية السامة حاضرة قدامك علشان متكررش وجود سام تانى ف حياتك و أتأكد إن كل وجع اتعرضتله بيعمل قدام منه شفاء من ألم تانى .
٤- الاستقرار :- بقي انك اختارت صح المرة دى و قلبك عايش هادى و مرتاح و نفسيتك متظبطة ف الاختيار الجديد سوا ( صداقة _ عمل _ حب _ زواج ) المهم انك تحس بأنك مستقر نفسياً .
و افتكر أن العلاقة السامة كانت مجرد ذكرى و درس مهما كان قاسي لكن اكيد خرجت من التجربه دى بدرس حياتك كله .
دمتم في كامل الاستقرار النفسي و السعادة الكامله بدون اى نواقص .