جاء فى نص التحقيقات في القضية رقم 54143 والمتهم فيها 7 أشخاص لاحتجازهم شخص إثر خلافات على معاملات مالية بينهم سالبين حريته، إذ تطور الأمر إلى محاولة المجني عليه الهروب من خلال الشرفة ولكنه سقط أرضًا، الأمر الذي أحدث إصابته التي أودت بحياته.
واستمعت جهات التحقيق لأقوال المتهم الأول صابر.ع والتي جاءت كالتالي: اللي حصل إن أنا اتعرفت على فضل عن طريق واحد صاحبي اسمه إسلام رمضان من حوالي شهر وعشرة أيام وفضل عرض عليا شغل في كافيه وبلايستيشن شراكة وشغل وقلتله تمام واتفقنا أنا وإسلام وعيد عبد الرحمن مع فضل الله أن إحنا هندخل شركاء في مشروع الكافيه.
وأضاف المتهم الأول بالتسبب في وفاة سوداني بفيصل: بعد فترة عرض علينا إنه يشغلنا فلوس ويدينا فوايد والأصل ثابت، وأخد من واحد فينا مبلغ مالي، وأنا خد منى 12 ألف جنيه وخد من إسلام حوالي 20 ألف جنيه وخد من عيد نفس المبلغ بس مخدش من عبد الرحمن عشان مكنش معاه فلوس وجمع مننا أكثر من 50 ألف جنيه وبدأ فعلا يدينا فوايد كل فترة وبعد شوية اختفى ومنعرفش عنه حاجة.
وأكمل المتهم: قعدنا ندور عليه حوالي 4 أيام بس موصلناش لحاجة وعشان إحنا عارفين إن فضل الله شغال في مزرعة في العبور روحنا له وعرفنا إن فيه واحد صاحبه اسمه أسامة شغال معاه وعيد عارفه وكلمه قاله فضل فين قالنا معرفش،عيد قاله أنت فين قاله أنا في شارع العمدة واتفقنا أن إحنا هنتقابل ورحنا له أنا وعيد بموتسيكل بتاع أخو عيد واتقابلنا مع أسامة وحكينا له اللي حصل وقولنا له يكلم فضل يعرف هو فين نقعد ونحل، وكلم فضل رد عليه وقاله أنت فين قاله أنا عند كايرو مول ورحنا له عند كايرو مول ملقيناهوش، وخلينا أسامة يكلمه تاني قاله إنت فين قاله أنا عند الفندق اللي كنا قاعدين فيه وفضل الله سأله إنت معاك حد قاله لأ وبعد كده طلعنا أنا وعيد وأسامة على الفندق اللي فضل قال عليه واستخبينا أنا وعيد، وأسامة كلم فضل وقاله إنزل أنا تحت ولما فضل نزل مسكناه أنا وعيد أنا مسكته من أيده الشمال وعيد مسكه من أيده اليمين وفضل يتشنج عشان يهرب بس إحنا كنا ماسكينوا كويس وطلعنا في نفس العربية اللي إحنا جينا فيها على شقة فضل الله في فيصل ودخلنا الشقة لقينا إسلام وعبد الرحمن وحسن جالنا بعدها دخلنا واتكلمنا مع فضل عشان يرجع الفلوس بتاعتنا وهو قالنا أنا متصرف وفضل يلف ويدور علينا وبعدين قالنا فيه 50 ألف سايبهم مع ناس صحابي في كايرو مول.
وواصل المتهم: أسامة وعيد طلعوا على العنوان اللي فضل قال عليه بس ملقوش حد فكلمونا على تليفوني وأديت التليفون لفضل عشان يرد عليهم لقيته خد التليفون وراح ناحية المنور على أساس أنه يتكلم معاهم لقيناه بيهرب نزلنا كلنا جرى عليه ومسكناه وطلعناه تاني الشقة وأسامة كان وصل الشقة وكلم أم فضل وقالها ابنك ناصب على ناس وفيه فلوس عليه وخلى فضل كلم أمه قالها أنا محتاج فلوس وناس ليها فلوس وكان مفهمهم إنه فاتح كافيه في الطوابق وأمه وافقت وبعتتلنا على حساب أسامة مبلغ 110 ألف جنيه وفضل قالنا اطلعوا على أسامة هاتوا الفلوس وطلعنا أنا وعيد رحنا لأسامة في قهوة قبل كوبري الحيزة وخدنا منه الفلوس ورجعنا على الشقة أنا وعيد ورجعنا الفلوس بتاعة كل واحد فينا بمكسبها بس مش كامل أنا خدت 20 ألف ومعرفش الباقي كل واحد خد كام وأنا هناك لقيت خالي مصطفى بيكلمني حكيتله اللي حصل قالي أنا جايلك وجالي هو وأمير صاحبه العراقي قعد معانا في الشقة وقعدنا شوية ومشيت وسبتهم وبليل في نفس اليوم لقيت الحكومة جايالي البيت خدوني وطلعنا على قسم الهرم وجابونا النهاردة على النيابة.