هى الستات عايزة أية ؟ سؤال بيسأله كل راجل !! .. بقلم هميس جمال

هى الستات عايزة أية ؟
سؤال بيسأله كل راجل !!
الستات عمرها ما كانت لوغارتمات ولا هى علامات إستفهام صعب ترجمتها ؟!
الست أبسط من كدة بكتير جداً .
تعالى اقولك الست عايزة أية من جنابك …
+ الست عايزة منك الأمان و الحماية ، و مهما كانت الحرب عليها ، تكون أنت الجُندى المحارب اللى تدافع عنها .
+ عايزة منك تكون ليها الستر و الغطاء يوم ما الدنيا تعريها و نظرات الناس تنهش فى جسدها ، ف محتاجة منك تسترها إنت بحبك و تغمرها بحنانك عليها .
+ الست عايزة منك تكون ضهر تستخبى فيه من الأيام و تتكل عليك ، وهى مطمنه أنها ف أيد أمينه .
+ عايزاك تكون مصدر القوة وقت ضعفها ، وأنها لما تفكر تقوى … فتستمد قوتها منك انت ، مش من التجارب ولا وجع السنين .
+ عايزة منك يوم ما حد يهاجمها تلاقيك أسد ف الدفاع عنها ، مش تكون إنت كمان جلاد عليها .
+ عايزة يوم ما يغلبها المرض ، تلاقي فيك الشفا .
+ و يوم ما تحس بالاحباط ، تشوف فيك الأمل .
+ عايزة إيدك تمسح دموعها ، متكونش انت المتسبب فيها .
+ عايزاك تكون راجل ليها … مش عليها ( أصلها تفرق كتير ) .
+ عايزاك متقتلش الطفله اللى جواها بكلام التهجم و السخريه عليها طول الوقت .
+ عايزة تكون بين إيديك الوردة اللى عمرها ما هتدبل أبداً .
+ عايزة تشوف نفسها ف عيونك ملكة و أميرة على كل النساء .
+ عايزة تشوف نفسها تاج على رأسك تتزين و تفتخر بيها قدام العالم كله .
+ نفسها تتكلم معاها زى ما بتتكلم مع غيرها طول اليوم ، مش تكون معاها ف البيت خزان أحزان و برة البيت حضرتك بغبان .
ف يا آدام طلبات حوا أسهل مما يمكن تحقيقها .
لكن يا صديقى تحقيق الأحلام دى كلها محتاجة لراجل يكون قد المسؤلية … راجل بجد !!
راجل عارف يسدد إحتياجاتها من قبل ما تطلبها .
و لازم تفهم إن طلبات الست مش محتاجة لجنى ولا لساحر علشان تتحقق .
هى محتاجة لإنسان يحس بيها .
– محتاجة تتقدر ، على مجهوداتها فى البيت و على مجهودها فى تربيه أولادك .
– محتاجة يتقالها كلمة حلوة ، و أنها مازالت جميله فى عيونك مهما كبرت فى السن ، و عدى على ملامحها الزمان .
– محتاجة إنها تتشاف .. فاهم يعنى إيه تتشاف ؟!
صدقنى الكلمة الحلوة للست هى إكسير الحياة .
ف لو مش شايف نفسك هتقدر تكون راجل مسؤل عنها بلاش تتجوزها .
أصل الرجوله صفة مش خانه ف البطاقة ، بيتكتب قدامها كلمة ( ذكر )
الرجوله الحقيقية … مبدأ و أسلوب حياة .