ما هو الحب ؟ بقلم/ هاميس جمال .

ما هو الحب ؟
بقلم/ هاميس جمال .
سؤال إتسالته كتير بما أنى كاتبه ف العلاقات الإنسانية
و بعد تفكير ف الإجابة و ملاحظة كل الشخصيات اللى حواليا اكتشفت أن للحب مسميات مختلفة لكل مرحله عمريه ، فى اللى قالى أنه ( مسكة أيد و وقت رومانسى ، و اللى قال إنه اشتياق و عذاب طول الوقت ، و اللى قال إنه كدبه كبيرة اخترعها الإنسان علشان يعيش وقت جميل ، و اللى قال إنه مسؤليه و رعاية ، و اللى قالى أنه أعظم مشاعر بتتعاش ، اللى قال إنه ونس و سند ) .
ف قبل ما أكتب المقال دة حقيقى اتكلمت و سألت شخصيات كتيره ف مراحل عمرية مختلفة علشان اقدر أكون صريحة ف أجابتى و منصفة ف كلامى .
و وصلت أن للحب أربعة أضلع متساوية .. و لقبته بفكرى المتواضع بأنه…
( مربع الحب الحقيقى )
نبدأ بأول ضلع و هو ( حب المراهقة ) ….
ف البداية كانت الإجابة على سؤالى ف مرحله المراهقة بأنه ( الحب السهل ) أو تقدر تلقبه ( بتوهج المشاعر ) تعريف الحب بالنسبه للمرحله دى بأنه ( مسكة أيد ويا خروجة جميله ، فسحة على السنيما جنبها أكله فشار لذيذة ، ويا سيل من كلمات الغزل و الاطراء المستمرة ) و لكــــــــن مع اول مشكله او عند ظهور الشخص الافضل و الاجمل من وجهة نظر المراهق ، سهل جداً ينتهى الحب دة .
ندخل بقى على الضلع التانى و هو ( المسؤوليه ) …
بتكون فيها الشخصية أكتر نضوج و بيكون للحب تعريف مختلف لأن وقتها التفكير بيكون أكتر عقلانيه و نضوج و هو ( المسؤلية ) الحب ف وجهة نظر الفئه العمريه دى بيتلخص الحب ف الإنسان اللى قادر يفتح بيت و يكون مسؤل عن تربيه أبناء تربيه سويه ، و قادر إنه يصرف بحب من غير بخل وهى قادرة تتحمل مجهود بيت و تربيه أبناء
حب كله مسؤوليه أكتر منه مشاعر متوهجة وقتيه ، مع وجود المشاعر طبعا لأنها ركن مهم جدا لأستمرار الحياة الزوجية السعيدة .
المسؤليه و الرعايه هنا بتكون كامله سواء كانت ( لزوج أو زوجة أو أبناء ) .
مسؤوليه بتعيش فيها كل متعة الإحساس بالنضوج النفسي و العمرى ، مع طرفين بيتبادلوا مسؤوليتهم من غير تزمر أو ضيق ، و لا حتى قلق .
نكمل سوا على الركن التالت و هو ( الإهتمام ) …
نكبر بقى حبه كمان ف العمر و ندخل سن ( الاربعين و الخمسين ) هنا بقى محتاجين إهتمام و مجهود .. و لكن من نوع مختلف محتاجين اللى يكون جنبنا ف إحنا بنلف على العيادات و الدكاترة ، محتاجين اللى يفكرنا بمواعيد الأدوية و يتابع معانا اوقات و أسماء الدكاتره اللى هتكون افضل للعلاج عندها ، محتاجين اللى لما نعمل عمليات يكون هو أول إنسان تفوق من البنج تلاقيه واقف قدام سريرك قلقان عليك ( و يقولك حمدالله على سلامتك ، أنا كنت هتجنن طول ما أنت ف العمليات ) .
ف هنا الإهتمام و المسؤوليه اجتمعوا على حب الشخص دة بأريحية كامله للقلب و الجسد كمان .
أخيراً بقى الضلع الأجمل و الاروع ف جميع العلاقات و هو ( الونس و السند ) …
دى المرحله العمريه الأكثر روعة و عظمة ف وجهة نظري و هى ( ما فوق سن الستين ) كل اللى محتاجينه وقتها هو { الونس } و ما ادراك بعظمة الشعور العظيم دة .
خلاص خلصنا أغلب رسالتنا ف الدنيا و بدأت خيوط الوحدة تحاصرنا من كل إتجاه ، و لكن يظل شريك الحياة هو الونس الوحيد ويا ضحكة خارجة من القلب الممزوجة بأهتمام بمواعيد كيس الأدوية اللى جنبك ع السرير ، و يا ذكريات الشباب و مسؤليه الاولاد بعد كمان إنضمام الأحفاد لمربع الحب .
هقولكم حكايه حقيقى عاصرتها و اكيد صاحبه الحكايه دى هتقراها ( كانت لجارتى ست جميله بمعنى الكلمة و أم لكل سكان العمارة ، كنت كل يوم اشوفها هى و جوزها الله يرحمه كل يوم الساعة ٧ الصبح بما انى بحب أصحى بدرى و أخرج أشرب قهوتى ف البلكونه و هما نازلين يتمشوا سوا و مسنودين على بعض و ماسكين أيد بعض يروحوا يشتروا فطارهم و يرجعوا على وشوشهم ضحكة جميله ، و ابتسامة صافية حقيقى و كانت دايما تقولى يلا تعالى نفطر سوا ، كنت بضحك معاها وقتها و أقولها مش هكون عزول ليكم و احشر نفسى بينكم بالهنا ليكم انتم يا غاليين ، و كنت بحب اشوفهم اوى و بجد كنت بقول الله على جمال و عظمة الإحساس بالونس و السند .
من هنا خرجت بخلاصة علمتنى كتير جدا عن حقيقة الحب و أن فعلا مربع الحب ( المشاعر المتوهجة ويا الاهتمام ويا المسؤوليه ويا الونس و السند ) ، مشاعر حقيقى مقدسة و ليها كل الاحترام .
الخلاصه
الحب الحقيقى علشان يعيش و يستمر ، لابد من وجود زواياه الأربعة علشان تقدر تعيش أسعد إنسان ف الكون .
و نقص ضلع واحد بس قادر إنه يتعسك باقى حياتك ، و يهد استقرارك النفسى باقى حياتك …
أختار صح ، لكن تقدر تعيش صح .
دمتم فى كامل السعادة مع أحبابكم .