الأكتئاب بكل ما يحمله من الآلم بقلم / هاميس جمال

الأكتئاب بكل ما يحمله من الآلم
بقلم / هاميس جمال
كان واقف قدام مريته زى عادته ، لكن المرة دى كان واقف يتأمل ملامحه و كأنه أول مرة يشوفها !
و دار حوار طويـــــــــــــل جداً يبنه و بين الشخص اللى قدامة ف المرآيا ..
– أنت مين
+ أنا الأكتئاب !!!
ـ بتعمل إيه معايا ؟؟
+ إنا صوت جواك بيلومك طول الوقت !
بيحبطك !
+ أنا اللى واقف عقبه بينك و بين سعادتك !
ـ علشان كدة أنا دايماً حزين و قلقان ؟؟
+ طبعاً و بإيدى أوصلك للأنتحار كمان !!
ـ من أمتى و إنت جوايا ؟؟
+ من زمــــــــــان جداً … أنا من سنين جواك ؟؟
– بس أنا عايزاك تخرج منى !!
هنا بيضحك الاكتئاب ضحكة سخريه ، و بيقول للشخص اللى قدام المرآيا …
+ مش بالساهل تخرجنى ، و لكن مفيش حاجة مستحيل .
دى مجرد حكايه من بنات أفكاري و لكن تعالوا كدة نقف كلنا قدام مرآيا أنفسنا و نتعمق ف النظر ليها .
هو إحنا ليه بنكتئب ؟؟
و إيه هى أعراضة ؟؟
و هل ممكن الشفاء ؟؟
نبدأ بالإجابة على أول سؤال و هو « إحنا لـــــــيه بنكتئب » ؟؟
أولا .. فى عامل وراثي للأكتئاب محدش يقدر ينكره
لأن اللى أتربى بين أب و أم محبطين و عايشين الاكتئاب بكل مراحله أكيد المشاعر دى هتتجسد جواه بدون ما يشعر بيها .
ثانياً .. قله الثقة بالنفس و الاحساس بالدونيه ليها عامل كبير جداً جداً فى نفس الإنسان .
ثالثاً .. كثرة التعرض للأحباط و ضغوط العمل .
رابعاً .. التعرض للتنمر و العنف سواء النفسي ، أو الجسدى .
خامساً .. إدمان المخدرات و الكحوليات ، أو عادات خاطئه .
ندخل سوا كدة على أعراضة !!!
ف الحقيقة الأكتئاب هو المرض النفسى اللى ليه عرضين نفسياً و جسدياً كمان بس هبدأ معاكم بالاعراض النفسية الاول :-
١_ حزن مستمر مهما كانت الاسباب لا تستحق مشاعر الحزن المبالغ فيه .
٢_ شعور بضعف الثقة بالنفس و الاحساس بالدونيه .
٣_ شعور باليأس و دائم الإحساس بالذنب .
٤_ دائم فى حاله القلق و التوتر .
٥_ إنعدام الرغبه فى الحياة ، مع ميول إنتحارية .
دى بالنسبه للأعراض النفسيه .
أما بالنسبه للأعراض الجسدية فهى كآتى …
١_ صعوبه فى النوم .
٢_ الخمول و الكسل .
٣_ إنعدام الرغبه فى اى متع الحياة .
٤_ فقدان الوزن أو العكس زيادة الوزن .
٥_ صداع مستمر و الألم فى جميع عضلات الجسد .
اعان الله كل شخص يعانى من الأعراض الجسدية دى لأنها فعلا مؤلمة و مش هيشعر بكلامى غير اللى جرب و عاش الألم الجسدى اللى بيسببه الأكتئاب .
و أخيراً الجزء الأهم و هو هل ممكن العلاج :-
مفيش حاجة مستحيل طبعا على الله ف الأول و الأخر
و لكن الشفاء بيتم عن طريق مراحل أهمها هى الأدويه العلاجية و دى مش خطر زى ما الأغلبيه العظمى متوقع ، أو فاهم عنها ، لكن بالعكس دى بتشتغل على ظبط كميا المخ .
و الدعم النفسي كمان مهم جداً و دة عن طريق الحديث مع شخصك المقرب نفسياً ليك .
شخص يكون هو مصدر الدعم النفسي الكامل و الكافى ليك .
الخروج من دايرة الاكتئاب عن طريق التنزه في أماكنك المفضله .
مصارحة نفسك بكل اوجاعك و مخاوفك بدون تجميل أو تحميل على الذات .
قبول نفسك بالضعفات قبل المميزات .
محاوله تغير اى سلبيات بداخلك بدون تردد أو حتى خوف .
هو دة مرض الاكتئاب اللعين و هى دى طرق الخروج من شبكته العنكبوتيه المصنوعة ضدك .
فأنت أقوى من مجرد مرض .
أنت كيان من حقة تقدير الذات و محبتها بدون شروط .
بدوووون شروط يا عزيزى القارئ .