{ الشعور بالذنب } مابين الصحى و الوهمى بقلم / هاميس جمال .

ـ أنا مش محبوب من الناس .
ـ ماما قالتى زمان انت جيت للدنيا غلط .
ـ الناس بتلومنى أنى لسه متجوزتش لدلوقتى برغم انى مفيش حد بيتقدملى .
ـ بابا و ماما دايما بيوصفونى انى فاشل و مش نافع ف حاجة .
ـ أخوك الصغير اجمل منك ، أنا مش عارفة إنت طالع وحش كدة لمين !!
ـ إنت غبى و مش هتنفع ف حاجة أبدا .
كل دى ملخصات بسيطة لمشاعر الرفض اللى بتكون جوانا ( الشعور بالذنب ) لما بنكبر .
تعريفة ببساطه أنه ( لوم النفس ) شئ صحى و مفيد و لكن فى حجمه الطبيعى بدون الجلد المبالغ فيه للذات .
لحد الآن كل دة مفيد و صحى لمعرفة الإنسان أخطاءه و حدوده مع الآخرين و لكن اية هى أعراض الشعور بالذنب الوهمى ) الغير صحى ….
١_ شعور مستمر إنك المسؤل عن كل غلطة بتحصل حتى لو مش إنت المتسبب فيها .
٢_ بتعتذر بصفة مستمرة على اى سبب ( لو ماشي ف الشارع و خبطت حد عن طريق الغلط !! كلمة اسف مش بتفارق لسانك أبدا ) .
٣_ بتحاسب نفسك بلوم شديد على أتفه تصرفاتك .
٤_ تأنيب ضمير و جلد ذات مستمر .. ( بتكبر حجم الغلطة ) .
٥_ إستمرار اللوم و الحزن حتى بعد الاعتذار أو الإعتراف بالغلطة .
٦_ يهمك جداً رأى الناس فيك ، دة أنت كمان بتشحت منهم الحب و الإهتمام طول الوقت .. لأن متنساش أن كان فى مشاعر بالرفض من الطفوله زى ما اتكلمت معاك ف اول المقال
أما بقى مشاعر الذنب الصحية فهى كالأتى …
١_ بتقبل ضعفك و نفسك و عارف إنك إنسان محدود و قابل للخطأ و الصواب .
٢_ واثق إن ربك غافر لأى خطأ طالما اعتذرت و توبت عنه .
٣_ بتراجع نفسك علشان متكررش أخطاء الماضى .
٤_ بتتعلم و بتعتذر عن الخطأ .
ندخل بقى على أسبابه و ليه اتولد جوانا الشعور المتعب و المؤذي دة
للأسف السبب الأساسي ثم الأساسي هما
١ـ ( الآباء الكمالين ) اللى شايفين أن أولادهم لا يحق لهم الغلط مهما كان تافهه ،، و ناسيين أن مع كل غلطة الطفل بيتعلم و بياخد خبره ف الحياة
٢ـ التعرض لمشاكل العائله قدام الاطفال لان دة بيوصل للطفل لا إراديا بمشاعر الرفض و عدم المحبه و الاحتواء .
٤_ التعرض للايذاء النفسي و الجسدى للطفل ( التحرش ) .
كل دة هيولد جوانا مشاعر هتفضل عايشة جوانا مهما حاولنا ننكرها زى :-
* الخجل و الخوف من المجتمع و دة سبب الاعتذار المبالغ فيه .
* كراهية النفس ( أنا السبب ف كل اللى بيحصل ) .
* حزن و اكتئاب ( هو أنا إيه لزمتى ف الحياة ) .
* كثرة نقد الأخريين ( كل الناس غلطانه و يستحقوا العقاب ) .
* المبالغة فى خدمة الآخرين ( طلب الاهتمام و شحاته الحب ) .
نبدا فى اهم بند و هـــــو { العلاج }
* لازم تدرك أن الشعور بالذنب ما هى إلا مشاعر وهميه .
* بلاش تلعب دور الضحية علشان تشحت الاهتمام و القبول .
* لازم تتأكد إن كلنا بنغلط و محدش فينا ملاك و أن ربك بس هو الغافر الأساسي لأى غلطة …
* ف صلاتك و توبتك بشكل مستمر هو الدافع الأساسي في إنك تبعد عنك اى شعور بالذنب .
* حب نفسك و اقبلها زى ما هى و ابعد نهائي عن جلدها .
دمتم في كامل الصحة النفسية و السعادة .