العتــــــــــــاب
للكاتبه / هاميس جمال
من ارقى المشاعر الإنسانية اللى كانت و مازالت دليل على المحبه و عدم التخلى عن الآخرين .
حاجة كدة بتقول بيها للطرف التانى أياً كان هو مين .. أنا لسه بحبك برغم إنك زعلتنى ، لسه باقى على عشرتنا و أيامنا الجميله ويا ذكرياتنا اللى صنعناها سوا .
أنا لسه عايزك فى حياتك .
أنا مش قادر استغنى عن وجودك جنبى .
ف يا عزيزى مشاعر العتاب اللى جواك ، لا هى ضعف و قله حيله ، و لكن دى من فرط حبنا و تمسكنا بعلاقات المحبوبه و المفضله لينا .
طيب هل كل العلاقات تستحق مننا العتاب لانه زى ما قلت ف البدايه أنها مشاعر راقيه و رائعة لأنها نابعة من أعماق القلب ؟
ف الحقيقة « لأ » مش كل العلاقات تستحق العتاب !!
و تعالوا معايا أقولكم ليه …
أولا .. الشخصية اللى نعاتبها مرة و أتنين على نفس الغلطة ، دى العتاب معاها مجهد جداً ، لأنك بكدة أنت بتعاتب على طبع مش مشكله أو غلطة و بمجرد العتاب الشخص هيعتذر و هتنتهى .
ثانياً .. الشخص اللى بيقلب عليك الترابيزة ، و بدل ما يعتذر و يقدر مشاعرك ف العتاب .. لأ دة بيطلعك أنت الغلطان ، دة كمان هيفكرك بكل اخطاءكم سوا من سنين فاتت !! و دة طبعا علشان ينسيك أنت كنت بتعاتب على ايه أصلاً !! اللى زى دة مستحيل أنه يعتذر .
ثالثاً .. الشخص المستهين بمشاعرك و يقولك « ياعم أنت مكبر الموضوع أوى كدة ليه » عادى يعنى .
رابعاً .. و دة الكارثة بالنسبالى اللى مصمم و عازم النيه على إهانتك و التقليل منك قدام الناس ، بدافع ( الهزار ) .
خامساً .. الشخص اللى شايف أن العتاب ما هو إلا معركة و لازم يطلع منها كسبان .
سادساً .. الشخص القاسي و المستهين بمشاعرك و اللى دايما هتلاقيه رافض الإعتراف بغلطه و طبعاً و بلا أدنى شك هتلاقيه رافض للإعتذار و بشدة ، لكن بالعكس دة بيفرض عليك أنت واجب الإعتذار ليه . « أصلك غلط ف حقة يا غلبان لما واجهته بغلطته ناحيتك »
طيب مين هما الناس اللى العتاب معاهم مُجدى و ليه نتيجة ..
١_ الشخص ( المُحب ) اللى أنت عارف و متأكد من محبته و صدق مشاعره ليك ،، لأن دة اكيد هيتقبل العتاب و هياخدة بصيغة المحبه و العشرة اللى بينكم .
٢_ الشخصية العقلانية و المتفهمة كلماتك و مفردات العتاب ، الأهم إنه يتقبل مشاعرك .
٣_الشخص اللى بيقتنع بأنه غلط ف حقك و مستحيل يكرر غلطة لأنه خايف يخسرك .
٤_ الشخص اللى باقى على العِشرة اللى بينكم و مصمم يمسك فيك لأنه شايف قلبك كنز لا يمكن يعوضة .
٥_ الشخص صاحب القلب الكبير و واسع الصدر .
سؤال بقى مهم شويه .؟
هو امتى العتاب يكون مجامله ؟؟
مبدأيا عتاب اللى بتكون فيه بتحاول أنك تحافظ على استمرار العلاقة بينكم و دة بيكون بلطف و محبه و دايما هادى زى مثلا ..
فينك مش بتسأل عليا ليه ؟
وحشتنى .. هو أنا مش واحشك ؟
طمنى عليك بقالك مدة مختفى ؟
لو تلاحظ كلها كلمات فيها محبه و ود .
مش خناق ولا شد و جذب و مين فيكم يطلع الكسبان و كأنها حرب .
و هى كمان العتاب الشديد بحس أن هدفه الأول و الأخير هو قطع العلاقات ، ولكنه عايز السبب يكون من عندك أنت ( علشان يستمر أنه يظهرك قدام الناس الطرف الغلطان و المدمر كمان علاقتكم ) و دة عتاب بيكون جارح ، كل كلماته بتعبر عن الغل و الغيرة و الحقد المستتر و متستغربش من كلامى لأن فى ناس فعلا بتظهر غلها و غيرتها منك على هيئه عتاب … نصيحة مني بقى { اخسر الشخصية دى و أنت الكسبان } .
و خد بالك ف الأول قبل ما تعاتب حد أن مشاعرك لا يليق بيها أبدا أن تستهان أو يقلل منها أى شخص مهما كانت غلاوته ف قلبك .
ميز يا عزيزي ف البدايه مين اللى يستحق مشاعرك الغاليه دى .. و مين اللى تنهى معاه علاقه أسست من البداية على التعب و المعاناه النفسيه تحت مسمى ( العتـــــــاب )
دمتم بخير دايما و أبداً .