” الإستنزاف النفسى

” الإستنزاف النفسى ”

للكاتبه / هاميس جمال .

أنا مش عايز أقوم من السرير.. مش عشان كسلان ، و لكن عشان حاسس إي فكرة إني أواجه اليوم تقيلة على قلبي زي الجبل.”

​دي كانت جملة ” مروان ” وهو قاعد قدام كوباية القهوة اللي بردت منه للمرة التالتة .

مروان هو ” شاب الشاطر ” في الشغل، “الأب المثالي ” في البيت، و ” الصاحب الجدع ” اللي الكل بيلجأ ليه .

من بره، حياته ماشية زي الساعة، بس من جوه !!! مروان كان بيتحرق على الهادي .. هادي جداً !!

​بدأ الموضوع بإنه مابقاش قادر ينام كويس ، بعدين بقى “خلقه ضيق” على أتفه الأسباب، لحد ما وصل لمرحلة إنه بقى بيتصرف و كأنه مجرد ” أله” مفيش طعم للفرحة، ومفيش طاقة جواه حتى للزعل

” مروان” ببساطة كان بيعاني من الاستنزاف النفسي !!

​هو يعني إيه إستنزاف نفسي أصلاً ؟؟

و هو دة هيكون موضوعنا النهاردة .

يا صديقى الإستنزاف النفسى هو المعنى الحرفي لصرخات مشاعرك اللى بتقولك اسمعنى ( أنا منهك جداً نفسيا و جسدياً ) هو حالة من الإرهاق العاطفي والعقلي الشديد بتحصلك لما تفضل تحت ضغط مستمر لفترة طويلة من غير راحة كفاية أو دعم مناسب من المحيطين بيك ..

. بمعنى أبسط كأن طاقتك النفسية ” إتسحبت منك” تدريجيًا لحد ما بقيت مش قادر تتحمل أي حاجة أو أى ضغط حتى لو كان بسيط .

يلا سوا نشوف أعراضه و دة علشان تعرف هل أنت مُستنزف نفسياً فعلاً و لا لأ ؟

• إحساس مستمر بالتعب حتى وأنت مرتاح ، من غير بذل اى مجهود .

• فقدان الحماس لأي حاجة (شغل ، دراسة ، علاقات)

• عصبي أو إنفعالك سريع على أسباب بسيطة .

• صعوبة في التركيز أو اتخاذ أى قرار مهما كنت واثق من نتيجة القرار إنه صحيح

• جواك إحساس رهيب بالفراغ أو إنك “مطفّي من جوه” .

• إضطرابات في النوم سواء كان ( أرق أو نوم زيادة )

• مفيش مانع كمان من وجود أعراض جسدية زي صداع أو وجع معدة أو التهابات القولون العصبى . كل دى أعراض إصابتك ” بالإستنزاف النفسى ”

بس عمرك سألت نفسك هو فى إيه يستحق إنك تتعب نفسك و توصل لمرحله التعب المستمر و الاحتراق الداخلى دة كله ؟

مين يستاهل إنك تتعب بسببه بالطريقة دى …

طيب إيه رأيك تحب نفسك شويه و تحاول و تقرر إنك تقف و بشدة لكل شخص يستنزفك نفسيا أو حتى جسدياً .

تعالى كدة معايا نتكلم على طرق التعامل مع الإستنزاف النفسى ..

١- حاول تقلل مصادر الضغط على قد ما تقدر .

٢- خد فواصل راحة حقيقية (مش بس موبايل و سوشيال ميديا ) زى إنك تاخد إجازة و تسافر و لو ليوم واحد أو تروح أى مكان هادى بتحبه و بترتاح فيه .

٣- إتكلم مع شخص تثق فيه و بيفهمك من غير شرح كتير لتعبك

٤- نظم يومك و نومك .

٥- مارس نشاط بسيط بيريّحك زى ( المشي ، رياضة خفيفة) من غير ما تزود مجهودك البدنى بشدة .

٦ – استشير متخصص نفسى و اتكلم معاة هو هيقدر يساعدك كويس جدا

عزيزى القارئ أحذر من

” الإستنزاف النفسى ” لأنه لو زاد عن الحد هيتحول” لإكتئاب نفسى ”

و نصيحة ليك و دى هتفرق كتير معاك … حب نفسك و أديها الأولوية و دة مش غرور ولا كبرياء منك و لكن من حقك تحافظ على مشاعرك من الأذى حتى من أقرب المقربين ليك .

دمتم بخير وعافية يارب