الغفــــــــــــران بقلم / هاميس جمال .

الغفــــــــــــران
بقلم / هاميس جمال .
بما إننا داخلين على سنه جديدة اتمنى للجميع أنها تكون
مليانه بالخير و السعادة
و لكن ايه رأيكم ندخل مع السنه الجديده بفتح باب مهم جداً لينا شخصياً قبل ما يكون مهم للآخرين .. و هو باب ” الغفــــــران ”
+ محدش فينا متجرحش و لا مرت عليه فترات حس فيها بالظلم أو القهر من طرف أو أطراف آخرى .
+ أغلبنا قدم خير و سلام و لكن قوبل من الآخر بالشر و الأذى .
+ أغلبنا تعامل مع الآخرين بسلام النوايا و المقابل كان خبث و لؤم … و يمكن كمان غدر .
مشاعر مؤلمة و طبيعى جداً أننا نحس بيها لأننا بشر ولكـــــــن ….
– هل فكرت قبل كدة ف الانتقام … وهل دة هيشفى جروحك .
– المقاطعة و العزله اللى مع الوقت هتؤدى للوحدة … هل دة شفاء .
– تشويه سمعة الطرف المسيئ ليك … هيرجع اللى راح منك .
– إنك تحقد على اللى آذاك و تتمناله الشر … دة هيريحك .
كل دى اسمها امراض نفسية نتاج مشاعر الغضب المصاحبه للإساءة .
طيب ايه رأيك ف الصداع اللى حضرتك عايش بيه ؟؟
_ القولون العصبي ، عامل ايه معاك ؟
_ الالم المفاصل ؟
_ أمراض المناعة ؟
_ النسيان المتكرر ؟
كل دى صرخات من الجسد من شدة الألم المصاحب للاساءات و مشاعر الغضب اللى ناتج عن عدم الغفران .
سؤال مهم بقي ” من اين يأتى الخلاف بين الطرفين اصلا ” ؟؟
تعالى اجاوبك
أولا.. من كلام سمعته جرحك ” ظلم ” … او كلام كنت مستنى تسمعه ” التقدير ” و للأسف متقالش ” زى تقدير الزوج لزوجته على مجهودها طول اليوم ” و يقابل بالتجاهل !! دة بيزعل .
ثانيا .. من فعل انتظرته من الطرف الآخر … و محصلش .
ثالثاً .. تكرار الأخطاء برغم الاعتذارات الوهميه .
تعالى نتكلم عن المفاهيم الخاطئه عن الغفران …
_ الغفران يا صديقى مش هو التأقلم أو إنكار الإساءة .
_ و لا هو لمس الأعذار ، لأنك بكدة بتفتح باب لتكرار الإساءة ف حقك .
_ ولا هو أمر متروك للأيام تحت بند أنها كفيله بالنسيان .
_ ولا هو نسيان اللى حصل في حقك من ألم و قهر و مرارة نفس .
لأ خــــــــــالص
الغفران الحقيقي هو التخلص من المشاعر دى كلها بدون رجعة .
هو تضميض لجروح كانت لسنين تنزف من الألم فى صمت
* ندخل لمرحله مهمة ف المقال و هو
” ازاى اغفر لكن أساء لى ” ؟؟؟
١ـ أعترف قدام نفسك بالجرح و أعطى لنفسك وقت للحزن لأننا بشر و دى مشاعر لابد من احترامها .
٢ـ لازم تفهم إن الغفران مسؤوليتك انت مش مسؤوليه الطرف الآخر ” لانه قرارك انت و بس ” .
٣ـ محتاج منك صلاه كتير و دعوات بينك و بين ربك إنه يساعدك على المغفرة الآخر . و دة زى ما قلت علشانك انت مش علشان غيرك .
و عايزاك تتأكد من حاجة مهمة … إن غفرانك للطرف الآخر لا يغير أبدا أبدا فى عدل الله و أن حقك عند الله محفوظ ، و هيرجع مهما طال وقت و صبر الله .. فالله عادل يا صديقي .
٤ـ العتاب المبنى على استعادة العلاقات … مش حرب مين فينا الغلطان ولا مين فينا اللى استحمل اكتر من التانى .
و أخيراً و دة هيكون اخر الحلول و هو ..
٥ـ وضع الحدود … لان مش معنى انى غفرت ف اقبل الإساءة مرة تانى .. لأ و الف لأ .
و أخيــــــــــراً
افتكر أن ربك غفرلك كتير و مازال بيغفر ، فأغفر إنت كمان للآخرين .
و هرجع تانى و أقولك ..
الغفران علشانك انت مش علشان الطرف الآخر .
دمتم في كامل السعادة بسنه جديدة كلها خيرات من رب الخيرات .