منتصف العمر ليس أزمة عمر … بل أزمة معنى .
للكاتبه / هاميس جمال .
هاله كانت متعودة كل يوم الصبح تعمل قهوتها و جنبها شباك زجاج ..
تأملات ملامحها و كأنها بتشوف نفسها لأول مرة !
أيه التجاعيد اللى حوالين عينى دى ؟
لمست شعرها و كأنها أول لمسه تحسها و شافت خيوط الشعر الأبيض بتنسج نفسها خصله ورا التانيه !
فجأة حضنت نفسها بشدة و طبطبت على كتفها و كأنها بتواسى الطفله اللى جواها و بطمنها و تقولها ( متقلقيش كله هيبقى تمام )
هو دة موضوعنا النهاردة اللى هنفتح قلبنا سوا فيه و نتكلم من القلب للقلب
أزمة منتصف العمر … يمكن كتير بيشوفها كابوس مرعب لمجرد إنه وصل لسن الأربعين ، و فى مننا اللى حاسس بندم على سنين عمرة اللى فاتت و جريت زى قطر سريع ملوش فرامل .
تاهت حياته بين شغل و بين مسؤليه أولاد ، و دفع فواتير كتير ملهاش نهاية .
و لكــــــــــن
أنا فين من كل دة ؟؟
تعالوا الاول نعرف إيه هى ازمه منتصف العمر
هى مرحله إنتقال و تطور نفسى و جسدى بيمر بيها الفرد من سن ( ٤٠ : ٦٠ ) سنه .
تقدر كدة تسميها مرحله من التطور الذاتى و بدايه للاسئله الوجودية و أسئلة متنتهيش بين الماضى و الحاضر والمستقبل كمان .
و أول دكتور نفسي إتكلم عنها و فسرها كان عالم النفس ( كارل يونج ) اللى سماها بفترة ( إعادة دمج الذات ) ما بين سن الشباب من ناحيه تركيز الإنسان على حياته الأولى زى العمل و الجواز و إثبات ذاته فى مجتمعة .
و ما بين منتصف العمر اللى يبدأ فيه الفرد بالبحث عن القيم الروحيه بينه و بين الله و بين قيمة الشخصية ، و هنا يبدأ إدراك الفرد يتغير نوعاً ما .
و يظهر على بالنا كلنا سؤال مهم و هو ..
أنا ليه فجأة حاسس انى إتغيرت حتى فى تفكيري و أولوياتى !
هو فعلاً إحنا بنتغير بعد ال٤٠
أحب أجاوبك و أقولك آه احنا فعلاً بنتغير سواء على المستوى الجسدى أو النفسى و حتى طريقة التفكير .
طيب ايه التغيرات اللى بتحصل ف أجسادنا سواء رجال أو نساء
أولا بالنسبه للرجل من الناحية الجسدية …
بتظهر معظم التغيرات الجسدية للرجل فى الانخفاض التدريجي والمستمر في هرمون الذكورة ( التستوستيرون) بمعدل ينخفض حوالي 1% سنوياً بعد سن الثلاثين ، و الإنخفاض دة بيسبب ليه بعض الأعراض زى :-
• تراجع مستويات الطاقة و الكتله العضليه .
• تغيرات في نمط النوم .
• تراجع الرغبه و القدرة الجنسيه .
• صعوبه في حرق السعرات الحرارية ، و إنخفاض الوزن .
• ضعف الصحة العامة و ظهور الأمراض المزمنه زى السكر و الضغط و ممكن أمراض القلب .
أما للاعراض النفسية فهى :-
• تقلبات مزاجيه و سرعة الإنفعال .
• الخوف من فقدان الجاذبيه و الشباب .
• الرغبه الملحة للتغيير ، علشان كدة بتظهر الرغبه الملحة في الاهتمام بالمظهر الخارجي .
• الفراغ العاطفى و شعور الوحدة لأنشغال كل الأبناء كل واحد بحياته الخاصة .
أما بالنسبة للمرأة ف بتكون كالاتى :-
• المحرك الأساسي هنا هيكون فى الإنخفاض التدريجي و المفاجئ في هرموني ( الإستروجين و البروجسترون ) .
• هبات ساخنه و تعرق ليلى .
• عدم انتظام الدورة الشهرية .
• تغير توزيع الدهون ف الجسم .
• تغيرات فى الشعر و البشرة .
• شعور بالإرهاق و الالم المفاصل و الخمول الجسدى .
أما بالنسبه للتغيرات النفسيه ف هتلاقيها كالآتي :-
• تغيرات و تقلبات مزاجيه مفاجأة .
• القلق والتوتر و نوبات الهلع .
• الفراغ العاطفى لإحساسها المفاجئ بالوحدة .
و هنا ظهر لينا سؤال مهم و هو
هل لأزمة العمر مميزات بعد كل اللى قلنا دة ؟
صدقنى لو قلتلك حقيقي ليها مميزات جميله لو كل واحد فينا عرف يستخدمها و يستفاد منها كويس …
تعالوا نتكلم عن مميزاتها .
لكن الاول إيه رأيكم نحذف من قاموسنا كلمة أزمة و نستبدلها بكلمة النضج العاطفى و الجسدى كمان .
من مميزاتها
١- إعادة ترتيب الأولويات و التحرر من أى علاقة كانت بتسبب ليك تعب نفسي ، و بقيت بس بتجرى ورا راحة بالك .
٢- بقيت تفهم نفسك أكتر من غير ما تظلمها أو تيجى عليها علشان خاطر حد .
٣- فرصة لاستعادة نفسك اللى تاهت منك وسط دوشة الحياة .
٤- ممارسه هواياتك المؤجله .
٥- العنايه و الاهتمام بصحتك و جسدك .
٦- كمان بتنقل حكمة و خبرة السنين للآخرين حواليك .
و زى ما لكل مرحله فى حياتنا مميزات .. فهى ليها كمان عيوب ، و من عيوب أزمة منتصف العمر أنها :-
• الشعور بالقلق و الاكتئاب المستمر على مرحله الشباب الضائع و الخوف من المستقبل و الشيخوخة .
• فقدان الشغف و إحساس بأنعدام القيمة خصوصاً من الناحية الوظيفية ( سن المعاش)
• الإندفاع و التهور و أخذ قرارات سريعة و دة سببه الأساسى الرغبه فى التغيير .
• الشعور بالوحدة و العزله
• أحياناً تؤخذ قرارت مصيرية زى الطلاق و الانفصال عن شريك الحياة ، سبب الملل العاطفى ، و الدخول فى علاقات جديدة .
بإختصـــــار يا عزيزى القارئ
أزمة منتصف العمر مش
“نهاية المطاف” و لكن هي بمثابة ” تحديث لنظام التشغيل الخاص بيك ” .
هى أشبه بجرس إنذار صحي بيقولك أن الوقت بتاعك علشان تعيش بوعي أكبر ، وبتطابق تام مع هويتك الحقيقية ورغباتك بصدق .
دمت فى كامل السعادة و الصحة عزيزى القارئ .