الرّجُل الشيكولاته
بقلم / هاميس جمال
يمكن دى اكتر جمله لاقيت إنها مناسبه ف التعبير عن الراجل الحقيقي بكل مميزاته .
حاجة كدة مسكرة و لذيذة طعمها هياخدك لعالم من النشوة و الخيال الممزوجين بالحقيقة .
معاة هتحسى إنك ملكتى الكون بكل كواكبه و مجراته كمان .
تعبير { الشيكولاتة } دة لأنك هتلاقى و إنتى معاة مزاق شيق لكل إحساس معاة .
فاهم يعنى أية يكون راجل معاكى و مسؤل عنك .
هتلاقية بيعشق شغله و دائماً ما يبتكر فية إثباتاً لكيانه الرجولى ، يعشق الحفاظ على هويته و شخصيته ، لأنه مدرك تماماً لأهمية العمل بالنسباله .
الرّجُل الشيكولاته مهندم ف لبسة و لياقته و نظافته الشخصية ، لأنه مدرك إنها عنوانه اللى بتكسبه إحترام المجتمع له .
رّجُل الشيكولاته عارف مميزاتة كويس بدون غرور و مُصمم يطور منها ، دة غير أنه متصالح مع نفسة و مُدرك لعيوبه ، و بيحاول بكل جهدة يتغير للأحسن .
رّجُل الشيكولاتة متفهم جداً لطبيعة النساء ، و لتغييرتهم النفسية و الهرمونية أحياناً ، دة كمان هيساعدك إنك تعيشي أجمل أوقاتك معاة مهما كان مودك أو تعبك .
رّجُل الشيكولاته مُقّدر لأجتماعياتك و حياتك الخاصة ، و متأكد إن غيرته عليكى مستحيل تقلل من شأنه ، لكن بتزيدة عظمة و إرتفاع ف نظرك .
هتلاقي دعمُة ليكى مستمر .. عايزك ناجحة و بيفتخر بيكى قدام العالم كله ، و لسان حاله يقول ( دى حبيبتى اللى إختارها قلبى و عقلى ) .
الرّجُل الشيكولاته مدرك إن مسؤليتك و سعادتك فرض من فروض الحياة علية و لكن هيقدمة ليكى بكل حب و تفانى ، و برضى عن ظهر قلب .
الحياه معاة زى ماتش كرة قدم بين فريقين أشطر من بعض ، كلها متعة و حماس و تألق مستمر .
الّرّجُل الشيكولاته عارف و مُدرك إن أحياناً خناقك معاة سببه الحقيقى هو خوفك و قلقك علية ، و طبعاً و الأكيد غيرتك برضو من عيون بنات حوا ، مش فرض سيطرة منك أبداً .
الرّجّل الشيكولاته حنووون لأبعد حد و عاطفى جداً و متأكد إن المشاعر دى مش هتقلل منه لكن هتزيد مكانته ف قلبك و عيونك .
الرّجُل الشيكولاته عارف كمان إحتياجك للكلمة الحلوة و دايماً يشبع قلبك بكلامة ، و متأكد إن وقت زعلك أو حزنك إنك مش محتاجة منه غير طبطبة من إيدة على كتفك و حضن حنين يضمك لية ، هيزيل بيه عنك كل همومك .
الرّجُل الشيكولاته عارف حدودة معاكى و مستحيل يبتزك أو يهددك أبداً ، تحت مسمى الحب .
الرّجُل الشيكولاته مستحيل ثم مستحيل يسيبك تنامى زعلانه ، أو يبعد عنك يوم واحد .
الرّجُل الشيكولاته متأكد كمان أن دورة هو الحفاظ على من نسمة الهوا اللى ممكن تجرحك ف بيكون نفسة يخبيكى جوة ضلوعة لو سمحت لية الفرصة
عرفتوا بقى أنا لية لقبته ( بالشيكولاتة ) !!
لأن حبه ليكى زى طعم الشيكولاته اللى هينقلك لعالم ممزوج ما بين ( الحقيقة و الخيال ) .
هتحبى نفسك جداً ف وجودة .
هتشوفية كمان مرآيتك اللى شايفة من خلالها العالم كله .
و هتحسى إن غيابة إن كل حاجة حلوة غايبة حتى الحياة نفسها ملهاش اي طعم من غيرة .
الرّجُل اللى زى دة لو القدر سمح ليكى و قابلتية ف أقل حقوقه عليكى إنك ( تحبيه من كل قلبك ) .