هو إحنا بنتجوز لية ؟؟ بقلم / هاميس جمال

الجواز مش لعبه بلاى ستيشن ، هتعمله turn on وقت ما تحب ، و تعمل turn off وقت ما تزهق .
و لا هو مقامرة و رهان أنك تتجوز أجمل بنت ف محيط معارفك و أهلك ولا جيرانك !!
مش مجازفه منك ، و يا صابت أو خابت … عادى تنفصل بسهوله .
ولا هو بنت ناس بتاخدها من بيت أهلها لمجرد إنها تخدم جنابك .
ولا هو الفانوس السحري اللى هيحققلك كل طلباتك .
ولا هو شوية مظاهر ، ولا حتى سن متأخر و خايف يفوتك قطر الجواز .
الجواز دنيا تانيه خالص سعادتك ، دنيا أغلبها معافرة علشان البيت ينجح ، و أساساته تتبنى صح .
الجواز مسؤولية و هحط تحت كلمة مسؤولية مليون خط .
من أول ما أتعاهدتم على الحياة بينكم ،، و من أول ما قررتم تتشاركوا فيها ، فأنتم مسؤولين عن بعض ، و مسؤولين كمان من بعض .
مسؤولين عن إسعاد بعضكم ، فالمسؤليه مش مجرد إنك تصرف عليها ، ما عادى كانت كدة ف بيت أهلها بتصرف برضه ، ف لو كنت فاكر إنك بتنعم عليها بالمصاريف فأحب أقول لحضرتك إنك مليون غلطان ، هى متجوزتش علشان مش لاقيه حد يصرف عليها .
هى اتجوزت علشان إختارت تكمل معاك اللى باقى من حياتها .
ف لو كنت فاكر إنها جات بس لخدمتك برضه هقولك غلطان ، لان فرق كبير جداً ما بين الزوجة و الخدامه .
اللى كل واجبها تنفيذ طلباتك .
ولا هى آداه جنسيه علشان تمتع حضرتك و بس .
و إنتى يا ست البنات ، يوم ما قررتى تكملى معاه حياتك فلازم تتأكدى إنه مش خاتم سليمان ، و لا الفانوس السحري اللى مطالب ينفذلك أحلامك .
لازم تتأكدى أن الجواز مهواش فشخرة كدابه على أصحابك و لا بنات عيلتك حتى .
ولا هو ليه أى علاقة بقطر الجواز اللى هيفوتك و يجرى منك بعيد .
و هرجع تانى و أقول إنه مسؤولية مشتركة ، مسؤوليه منكم علشان حياتكم ترسى على بر الأمان ، مسؤوليه منكم بالسعادة ، و الحب الغير مشروط .
لكل راجل تعالى أقولك هى البنت بتتجوز ليه .
مش لأنها محتاجة اللى يصرف عليها .د، ولا اللى يقولها بس كلمة حلوة ..
هى بتتجوز لأن جوه كل بنت عاطفة شديدة لتكوين بيت و أسرة .
بتتجوز لانها اختارتك من وسط كل رجاله الكون علشان تكمل معاك إنت … إنت مش حد تانى …. فاهم ولا أية حكايتك ؟؟
بتتجوز وهى مدركة حجم مسؤوليتها عن بيتها و تربيه أولادها ، و عارفة إنها هتكون قد المسؤوليه .
بتتجوز و هى مدركة إنها وقت الجد هتكون ليك السند و الأمان ، و الحضن اللى هترجع من شغلك تلاقيه مفتوح ليك و مستنيك ٢٤ ساعة .
بتتجوز و هى شيفاك تعويض الأب ، و الأخ ، و عائلتها كلها .
و انتى يا ست البنات تعالى أقولك هو سيد الرجاله بيتجوز ليه …
لأنه بيكون شايفك مصدر استقرارة .
اتجوز علشان يسلملك زمام أمورة ، و تكون معين ليه و معاه ف خطوات حياتة .
و أتأكدى إنه لما إختارك من كل بنات الكون و راح بيت أهلك و أتقدملك فهو عايزك زوجة …
مش أم !!
فأرجوكى إحذرى من لعب دور الأم معاه .
من حقوقه عليكى أنه لما يرجع بعد يوم طويل و مجهد من شغله يلاقى الست الدلوعة الفرفوشة اللى تستقبله بحضن طويل يشيل عنه تعب يومه .
إختارك و إتجوزك انتى علشان تصونى بيته و عرضه و ماله .
الراجل بيتجوز علشان يعيش فى سعادة … فبلاش نكد ، ارجوكى بلاش النكد لأنه العدو الأول و اللدود للجواز .
و علشان نعيش كلنا حياة زوجية سعيدة تعالوا كدة نحط أيدينا على شوية حاجات مهمة لأى زوجين
١- أهم خطوة فى الحياة الزوجية هى الإحترام المتبادل ما بينكم .
٢- إحذروا بشدة من وجود طرف تالت ما بينكم بحجة إنه يحل مشاكلكم و لو لزم الأمر يكون بإختياركم أنتم الاتنين و يكون إنسان حكيم .
٣- حاولوا كمان يطلع يوم جديد عليكم و أنتم ناسيين مشاكل اليوم اللى قبله .
٤- فى أى خلاف يحصل ياريت تخرجوا ف مكان هادى و تتكلموا علشان دة هيكون نقطة مهمة جداً إن الخلاف مايزدش و لا صوتكم يعلى على بعض قدام الناس .
٥- هونوا على بعض التعب ، بلاش تقللوا من بعض أبداً ، و أتاكدوا إن لكل واحد فيا معركة بيخوضها لوحدة يمكن الطرف الآخر ميعرفش عنها حاجة .
٦- أشتروا لبعض هدايا من غير مناسبه .. اعملوا مفجأت تفتكروها سوا لما تكبروا .
٧- إتفقوا سوا على أسلوب تربيتكم لاولادكم علشان الولاد متكبرش وهى كارهه طرف فيكم بتهمة إنه أب أو أم شداد ، و اتهموا بالقسوة فى نظر أولادكم .
٨- أحضنوا بعض قدام الأولاد ، حضن رفق و مودة علشان هما كمان يكونوا أزواج صالحين .
و متنسوش أن اولادنا بتتعلم مننا اللى بيشوفوه ، مش اللى بيسمعوه .
دمتم في كامل السعادة الزوجية .