خطف محمود عبدالرازق شيكابالا قائد فريق الكرة الأول بنادي الزمالك، قلوب جماهير الزمالك، وفتح صفحة جديدة مع الأهلي، بعد حديثه الرائع عن مسيرته داخل القلعة البيضاء، وعلاقته بلاعبي الأهلي الحاليين.
وكشف شيكابالا العديد من المفاجآت حول مشواره الكروي وموعد اعتزاله في حوار له مساء أمس عبر فضائية إم بي سي مصر، وطالب خلال الحوار بالتبرع بإيرادات السوبر الإفريقي بين الأهلي والزمالك لصالح الشعب الفلسطيني.
قال محمود عبد الرازق شيكابالا: ” أبويا كان بيكسر التلفزيون لو الزمالك خسر وكان نفسي أبويا يشوفني وأنا بلعب فى الزمالك لتحقيق حلمه ولكن توفي وعمري 10 سنوات”.
أحمد الكأس مثلي الأعلى
وأضاف: “مثلي الأعلي هو أحمد الكأس وتمنيت أن أصبح مثله لاعبا فى الزمالك وكنت بركب القطر القشاش لوحدي من وأنا عندي 9 سنين عشان أروح الزمالك وأسوان تمتلك مواهب أفضل مني، وأقوم بالوقت الحالي بتأسيس أكاديمية تسمي شيكابالا”.
وتابع: “أول مرة ارتدي قميص الزمالك كان فى اعتزال أيمن منصور وإمام عاشور زملكاوي مجنون وكان عايز التي شيرت بتاعي في نهائي الكأس بالسعودية.. ومش هينفع أقول قالي إيه بس خير إن شاء الله”.
وأكمل: “معملتش حاجة في نهاية الدوري ورئيس الاتحاد أحمد مجاهد قال كدا ووقفوني 8 مباريات.. إمام عاشور لما كان في الزمالك ضرب وليد سليمان وقفوه 12 مباراة وحسين الشحات ضرب الشيبي على وجهه وسبه واتوقف ماتشين هل ده عدل”؟ وأرى أن ملف أزمة الشحات والشيبي لازم كل الأطراف يحصل لها تراضي، حسين قال إنه غلط ودا شئ كويس منه، وأحنا بنحترم الشيبي ومصر والمغرب واحد، الموقف اللي حصل من حسين عصبية ملعب وأحنا كلنا بنغلط، وياريت نلاقي حلا للأزمة ولو عاوزني أروح للشيبي اعتذر له هروحله”.
أحمد فتوح أحرف لعيب في الزمالك
وواصل: ” فتوح أحرف لعيب في الزمالك.. لما روحت أسوان قالوا راح يأكل فسيخ، أنا رحت عشان أسلم على أخواتي، وجبت فسيخ للجهاز الفني مش للاعيبة”.
واستطرد: “قعدت مع عدلي القيعي عشان أروح الأهلي بس الفكرة ما كنتش متقبلها، أول مرة اتمرنت في الأهلي بليل لوحدي لبست تي شيرت أبيض، وخرجت اليوم ده قلت مش هاقدر لحد ما رجعت الزمالك”.
وواصل: “أصعب حاجة أنك تتفرج على فرقتك في نهائي الكونفدرالية كنت هموت وأنا بره.. نفسي نركز على ولادنا الناشئين الصغيرين بدل ما نشتري ممكن ما يكونش فيه فلوس.. ده الإرث والاستثمار الحقيقي في الزمالك”.
وعن موعد اعتزاله قال شيكابالا: “ما خدتش مقدم عقدي اللي مضيته من شهرين.. جددت عامين، كابتن حسين لبيب قالي بطل وقت ما أنت عايز، بس أنا مش هكمل سنتين السنة الجاية وهقول خلاص”.
وعن أزمة محمد الشناوي والإعلام قال شيكابالا: “عجبني الشناوي لما تحدث عن الإعلام والصحافة.. هو عنده حق لكن غلط في التعميم.. واللي قاله هو اللي بيحصل معايا لأن لو حد قاله عليه حاجة وطلعت غلط هل هيعتذر له ؟ مش هيعتذر”.
أرفض عودة إمام عاشور للزمالك
وأكمل : “أرفض عودة إمام عاشور للزمالك وخسارة الزمالك نهائي القرن أمام الأهلي هي الأصعب فى مسيرتي وأتمني الاعتزال وسط جماهير الزمالك والزمالك يحتاج 8 صفقات فى الصيف، وأتمني عودة جنش للزمالك”.
اتمنى انضمام رمضان صبحي للزمالك
عن علاقته بمحمد صلاح قال: أتواصل مع محمد صلاح وهو الأفضل فى مصر وأتمني أن ينضم رمضان صبحي إلي الزمالك وعبد الله السعيد مدرب كبير فى الملعب وكنت أتمني انضمامه من سنوات.