كشفت التحقيقات في قضية اتهام شخص وزوجته با ستدراج سيدة تحمل الجنسية السعودية داخل كمبوند بالتجمع الخامس لمواقعتها وإقامة علاقة معها وتصويرها بدون ملابس وتهديدها للاستيلاء على أموالها، تفاصيل الواقعة.
واعترفت الزوجة فى نص التحقيقات في القضية وجاءت أقوال زوجة المتهم كالآتي: اللى حصل إن أنا وجوزي كنا سهرانين في مكان سهر فيه وبعدين لقينا واحدة وجوزها قاعدين على طرابيزة جمبنا واتعرفنا على بعض عادي وسألناهم أنتوا منين وكذا قالولنا إحنا من السعودية وعادي وبعدين هما خروجوا قدام الفندق وإحنا أخدنا أرقام بعض عشان نخرج مع بعض.
وأضافت زوجة المتهم في التحقيقات: بعدين إحنا سألناهم هتروحوا إزاي قالوا إنهم هيروحوا بأوبر فإحنا عرضنا عليهم إننا نوصلهم على المكان اللي ساكنين فيه وإحنا في الطريق قعدنا في مكان شوية عشان نشرب قهوة ونفوق شوية علشان إحنا كنا سكرانين وبعد كدا وصلناهم على بيتهم وهو قبل دخلة الكمبوند وبعدين تاني يوم هيا وجوزها عزمونا في مكان وهو نفس اللي تقابلنا فيه أول مرة وكان ساعتها هيا وجوزها وأنا وجوزي مع بعض وبالفعل قبلنا العزومة بتاعتهم ورحنا على المكان حوالي الساعة الثانية عشر بالليل.
وتابعت: وسهرنا أنا وجوزي معاهم وهم كانوا جيابين كل حاجة ازازات خمرة وكل حاجة لزوم السهرة وبعد ما سهرنا مع بعض روحنا عادي وثاني يوم أنا طلبت لهم أكل مصري وبعت لهم على البيت اللي هم ساكنين فيه عشان أرد العزومة اللي هما عزموها لينا قبلها بيوم وأنا وجوزي رحنا على البيت عندها ولما رحنا قابلنا جوزها وهي كانت برا ولما رجعت اتغدينا مع بعض وبعد كدا تاني يوم هي سافرت هي وجوزها للسعودية وهي في السعودية بقينا نتواصل مع بعض فيس تايم وتليفونات.
واستكملت زوجة المتهم في التحقيقات: وهيا سافرت السعودية وقالت ليا إنها جابت شقة في كمبوند علشان هي اشترت شقة وبتجهزها وبتشطبها وهي جابت الشقة دي علشان تقعد فيها هي ومامتها على ما بال ما تتشطب الشقة اللي اشتريتها في التجمع وقالت لي أحول لها خمسة آلاف جنيه مقدم الشقة على ما تنزل مصر وترجع الفلوس وقالت إنها هتنزل يوم الثلاثاء الموافق ۲۸-۱۱ ۲۰۲۲ بس هي نزلت يوم الأحد الموافق ٢٦-١١-٢٠٢٢ وبعت لي رسالة الساعة ٩.٠٠ صباحا قالت فيها إنها وصلت المطار في القاهرة ومدير أعمالها مستنيها في مصر.
وأردفت: وبعد كدا كلمتني على آخر النهار قالت لي إنها راحة على فندق علشان فيه معرض هناك في الفندق علشان هي عاوزة تشتري شاليه في العين السخنة وهي كلمتني قالت لي إننا هنخرج بالليل فقلت لها مش هينفع علشان عند أولادي مدرسة الصبح، وبعدين ساعتها جوزي كلمني قالي لازم تخرج علشان دي صحبتك ولازم نخرج معاها فساعتها إنا شكيت إن فيه علاقة ما بين جوزي وهيا، وخرجنا ولما رجع جوزي البيت قالي لازم نخرج معاها علشان متزعلش فرحت حجزت في مكان سهر بمنطقة الزمالك وإحنا بنلبس علشان نخرج نروح نقابلها.
وأشارت زوجة المتهم في التحقيقات: ساعتها لقيت جوزي بيقولي إن الست دي مش تمام وهي عاوزة تنصب علينا علشان دي لو سيدة أعمال زي ما بتقول مش هتخلينا نحول لها خمسة آلاف جنيه مقدم الشقة اللي هي أجرتها وبعدين جوزي قالي أنا هرقص معاها وأنا أصورهم وجوزي بيرقص معاها علشان نطلب منها فلوس 10 آلاف جنيه، منهم 5 آلاف جنيه اللي أنا حولتهم، والخمسة آلاف جنيه بتوع الخروجة واتفقنا بعديها إننا نصورها في البيت عندها وهي بدون هدومها في بيتها واتفقنا إني أعمل تعبانة علشان تطلب مننا أننا نروح معاها على شقتها ونطلع وتنفذ الاتفاق ونصورها.