“زياد مسعد” شاب مصري من محافظة سوهاج عنده 18 سنة وبيدرس في 3 ثاتوي.. خالته اتوفت فجأة بسبب ارتفاع نسبة السكر عندها، وللأسف ده حصل وهي قاعدة لوحدها في البيت!.. قرر “زياد” وبسبب حزنه عليها يكون له دور مهم إن اللي حصل ما يتكررش تاني مع أى شخص مسن عايش لوحده!.. عمل إيه؟.. ابتكر بالتعاون مع زميلة له اسمها “مريم”؛ مشروع “طبيب إلكتروني” وهو عبارة عن روبوت متنقل في البيت ياخد باله من المرضي والمسنين خلال الأزمات الصحية المفاجئة!.. إيه الحكاية!..
الموضوع وزى ما بيحكي “زياد” بدأ بإنه بعد ما صمم الروبوت سجل عليه الإحصائيات الطبيعية للشخص المتعافي السليم واللي بيقيسها الطبيب المعالج.. بعد كده بيكون فيه ساعة بيلبسها المريض في إيده متصلة بشريحة خاصة في ذراع الروبوت عشان لو حصل أى خلل يتم رصده فوراً ويبدأ الروبوت في التدخل.. برضه بيسجل على الروبوت الأدوية المناسبة للحالة المرضية عشان يقدمهاله في حالات الطواريء، ولو الروبوت ماستقبلش أى إشارة بعد إستخدام الأدوية هيتم الاتصال فوراً على الأرقام المسجلة عليه عشان يتم إنقاذ المريض..
الروبوت بيقيس نبضات القلب، وبيقيس ضغط الدم، وبيحلل الدم، ونسبة السكر وغيرهم..
“زياد” جرب الطبيب الإلكتروني على أكتر من حالة، وكانت النتائج عظيمة وسجل براءة اختراع لمشروعه في أكاديمية البحث العلمي في القاهرة، وحصل على موافقة بصلاحية استخدام الروبوت من كلية الحاسبات والمعلومات، وشارك بيه في معرض الابتكار الدولي وفاز بالمركز الأول على مستوى الجمهورية من بين مشاركة 26 دولة في المعرض..
“زياد” نفسه يشوف اختراعه موجود في كل المستشفيات المصرية عشان يكون سبب من ربنا في إنقاذ الأشخاص الكبيرة في السن والمريضة اللي بيعانوا من الوحدة.. بيقول كمان إنه حالياً بيشتغل على تصميم سيارة إسعاف إلكترونية بدون سائق تكون مرفقة مع الروبوت عشان حالات الإنقاذ السريعة..
يمكن المشروع محتاج تعديلات كتيرة قدام، بس الأهم إن فيه عقلية مصرية شابة ومبدعة من مئات ويمكن آلاف العقول الذهب؛ قررت تعمل شيء مختلف وتشتغل عليه ونفذته.. كل التحية لـ “زياد” ولكل شاب مصري بيجتهد عشان يقدم حاجة غير تقليدية تخدم