عمو فؤاد هو فؤاد زكى محمد المهندس ابن حى العباسية
خريج كلية التجارة هو الشاب اللي اطاع أمه لما حب يدخل معهد الفنون المسرحية ورفضت وبناءا على أوامرها دخل كلية التجارة
هو اللي لأول مرة في حياته يطلع على خشبة المسرح وكان تلميذ في ثانوي يومها كان حفل عيد الام وراحت امه الحفله ومكانتش تعرف ولما شافته قالت له كلمه واحده
انزل ياولد ….
وسمع الكلام ونزل وساب العرض المسرحي وكان كلام امه بالنسبه له سيف على رقبته .
هو الشاب اللي من حبه للفن اول ماراح كلية التجاره مسألش فين السيكشن أو المدرج بتاعي لكن اول حاجه عملها سأل فين فريق التمثيل اللي هنا هو اللي كان ملازم نجيب الريحاني زى ضله من فرط اعجابه بيه وفعلا كان تلميذه النجيب
هو الفنان اللي عمل طفره نقله غير عاديه في الكوميديا المصرية
هو الفنان اللي لاتخجل انك تشوف اعماله لانك في الغالب بتطلع منها بحكمه أو عبره ولذلك مش هتلاقي في معظم اعماله حاجه تتكسف تشوفها
هو الفنان اللي عشق الاطفال دوماً فكان لازم يشارك معاه طفل أو طفله في فيلم او مسرحيه زى الراجل ده هيجنني انا فين وانتي فين انها حقا عائلة محترمة. هاله حبيبتي غير طبعا فوازير عمو فؤاد .
هو الفنان اللي انتقد سلبيات كتير وسلوكيات شاذه طرأت على الشارع المصرى بل والمسؤولين كمان من خلال برنامجه العظيم الخالد كلمتين وبس عن العظيم المحترم عمو فؤاد فؤاد المهندس