هاميس جمال تكتب .. شخصيات مرهقة

شخصيات مرهقة
فحياتنا اليومية بنتعامل مع شخصيات كتير و طباع مختلفة منهم اللى بنرتاح معاها ، و منهم اللى بتمتص مننا طاقتنا الروحية و الجسدية كمان .
ف الاول محتاجين نعرف أن الطاقة نوعين
طاقة جسدية و دى المسؤلية عن قوة الجسد اللى بتمدنا و تساعدنا على المجهود البدنى اليومى .
و طاقة روحية و دى موضوعى النهاردة
في شخصيات متعبة جداً و مرهقة للنفس و للروح .
فكام مرة كنت متواجد مع شخص و حسيت إنك مش مرتاح نفسياً و إنت معاة .
هكلمكم عن ثلاث شخصيات
أول شخصية مرهقة للنفس أو مصاصه لطاقتنا الروحية و هى ….
الشخصية المستفزة .
الشخصية دى بتتغذى حقيقي على اعصابك و هدوئك و سلامك النفسى .
سماتها الأساسية التصرف معاك بكل برود أعصاب علشان تخرج منك أسوء ما فيك .
سمه تانى إنها هتحاول إغضابك بكل الطرق قدام الناس علشان تظهر إنت العصبى و صاحب المشاكل وهى الشخصية البريئه .
نظراتها باردة دائما .. ردودها باردة .. سلامها بارد .
علاجها ف التعامل هو النظر ليها بكل قوة و ثقة بالنفس و تبعد عنها بكل تجاهل بعد كدة و عدم عمل أى إعتبار لوجودها .
الشخصية التانية و هى الغدارون أو الطاعنون من الخلف .
مفيش شك أن قمة الالم اللى ممكن نتعرض لية هو إن يتغدر بينا بعد ما نعطى كل الأمان ، و الثقة ، و إعطاء كل الحب للشخص الغدار .
طيب ازاى نعرفهم أو أية هى سمات الشخصية دى -:
أولا هتلاقيهم يقدموا كل الحب ليك بزيادة عن اللزوم .
بيحاولوا يجمعوا عنك كل المعلومات و دى طبعا علشان وقت الغدر بيك يكون معاهم أدله تدينك .
دايماً لابسين توب الملايكة قدام كل الناس .
اجتماعيين جداً ، و دة طبعا لمعرفة كل أخبار و أسرار الغير .
و بدون مبالغة معرفتهم سهله جدا .
تعالى اقولك ازاى تعرفهم ( كل اللى يتكلم عن غيرك بالسوء ثق الف ف المية إنه بيتكلم عليك بنفس الطريقة و الأسلوب اللى أتكلم به عن غيرك قدامك ) .
هتلاقية كمان شخصية نمامة جداً و تعشق الكلام عن الآخرين .
نتصرف ازاى بقي مع الشخصية دة …
عدم اعطائها أى معلومه عنك أو عن غيرك
عدم الانحياز وراء كلامها و النم على الغير معاها
و احذر كمان دموع التماسيح اللى هى مبدعة ف إخراجها قدامك علشان تكسب تعاطفك .
شخصية تالته و هى الشكاى أو اللوام .
مرهق جدا إنك تتواجد مع شخص طول الوقت و اليوم شكوى من كل حاجة و كل الناس .
سمات الشخصية دى هى النقد من كل حاجة و الملامة على كل الناس ، حتى من نفسة .
( شكوى من صحته .. من أصحابه .. من أهله و معارفة )
أقولك حاجة كمان …
دة هيشتكى من شكله و وزنه و ملابسة و معندوش أبداً أى استعداد للتغير .
دة هيشتكى كمان من حاجات هو ملوش فيها أى تدخل زى شكوته من ( زحمة المواصلات و إدارة الدوله و الدول المجاورة ) …
شعارة الأساسي ( شكوى لمجرد الشكوى) .
هيوصلك إن حياتة كلها مشاكل و أنه ضحية المجتمع .
طبعاً مش هقولك اللى زى دة إزاى هتعرفة ، لأنه واضح جداً من كم الشكوى و التذمر اللى عايش فيها .
نتعامل معاة إزاى بقى ؟؟
تعالى أقولك ..
فكره دائماً بنعم الله عليه من صحة و بركة ف بيته و حياته اليومية ، و إن دى سُنه الحياة و إن التعب موجود لتقويم البشرية مش غضب من الله علينا .
و شخصيات تانية كتير هبقى أتكلم عنها ف مقال تانى إن أراد الله .
نصيحة أخيرة
حاول تكون شخصية محبوبة المعشر لكل اللى يتعامل معاك .
و إن حصل و إتعاملت مع شخصيات من هذة النوعية المتعبة و الماصة لطاقتك الروحية و النفسية ، أبعد عنها لأن دة حقك على نفسك إنك تعيش مرتاح البال و نشيط الروح و الجسد .
دمتم فى كامل الصحة النفسية و الجسدية .