بطل الافلام الرومانسية الغنائية واللايت كوميدي .. دي الصورة الذهنية اللي ناس كتير واخداها عن #محمد_فوزي لكن ده مش حقيقي والدليل الفيلم اللي حكلمك عليه النهاردة.
فيلم “معجزة السماء” انتاج 56 من اخراج “عاطف سالم” وقصة وسيناريو “على الزرقاني” بالاشتراك مع “محمد فوزي” وهو بالمناسبة أخر فيلم عمله “فوزي” مع زوجته “مديحة يسري” وفعلا كان فيلم مختلف ويمكن افضل افلامه من حيث الاداء لأنه أثبت ان “فوزي” يقدر يلعب ادوار تراجيدي وكمان القصة كانت مميزة والأهم هو رسالة الفيلم العميقة جدا واللي اتقدمت ببساطة في حبكة مميزة.
الفيلم هو تجسيد حرفي لمقولة “لو علمتم الغيب .. لإخترتم الواقع” وبيحكي عن الشاب “محمد” اللي بتجيله فرصة شغل كمغني في “تياترو” في اسكندرية لكنه بيتأخر عن ميعاد السفر وبتضيع الوظيفة وتتغير معاها حياته ويتزوج لكن د بتحاصره المشاكل بسبب الفقر وعدم قدرته على تلبية احتياجات اسرته وده يقوده لشعور دائم من “السخط والاعتراض على قدره” اعتقادا منه ان حاله كان حيبقى افضل لو كان لحق يسافر ويمضي عقد الوظيفة.
بيهجر “محمد” زوجته واسرته لكن بيحصله حادث يدخله في غيبوبة قصيرة يحلم فيها اللي كان حيحصله لو كان سافر ومضى العقد وبقى مشهور ويشوف ازاي ربنا انقذه من سيناريو اسوء كان حيحصله وان للاسف الانسان مش بيعرف قيمة النعم اللي حواليه غير لما يتحرم منها.
على مستوى الموسيقى .. كالعادة الفيلم فيه اغاني وموسيقى مميزة اهمها “كلمنى..طمنى” ودي اغنية مميزة جدا لأن “محمد فوزي” يعتبر غناها “Acapella” يعني بدون موسيقى .. فقط صوته وصوت الكورال فقط ودي كانت تجربة فريدة جدا في وقتها.
الفيلم تقدر تتفرج عليه على يوتيوب لو ما شفتوش قبل كده ولو شوفته قولنا رأيك في التعليقات.
