كشف المتهم الأول في واقعة مقتل الطفلة ريتاج صغيرة مدينة نصر، أنه تعدى عليها حتى الموت بواسطة سلك كهرباء، بتحريض من والدتها بسبب التبول اللاإرادي، وأنهما اتهما والد الطفلة بقتلها للهروب من الجريمة.
ووفقا للتحقيقات في قضية مقتل الطفلة ريتاج بمدينة نصر، حيث أنكر المتهم الأول ما هو منسوب إليه، من أنه متهم بالاشتراك مع المتهمة سارة والدة المجني عليها في قتل المجني عليها ريتاج عمدا مع سبق الإصرار والترصد.
وقال المتهم بقتل طفلة مدينة نصر في التحقيقات: أنا كان قصدي أضربها مكنش قصدي أقتلها، واللي حصل إني أعرف سارة من حوالي شهرين عشان بشتغل في كشك سجاير في عين شمس، وهي كانت ساكنة قريب من الكشك اللي بشتغل فيه، وكانت بتعدي تشتري حاجات من عندي، وفي مرة قالتلي إنها محتاجة سكن تعيش فيه عشان مش معاها فلوس تدفعها في إيجار السكن اللي كانت ساكنة فيه هي وبناتها في عين شمس، فقولتلها أنا عندي شقة في عزبة الهجانة تعالي اسكنى فيها، فلمت حاجتها وجت تسكن في الشقة بتاعتي في عزبة الهجانة هي وبناتها ريتاج وسما، ودي كانت مجدعة مني من غير إيجار ولا فلوس ولا حاجة.
وأضاف المتهم بقتل ابنة عشيقته بمدينة نصر في التحقيقات: إمبارح لقيتها اتصلت بيا وقالتلي تعالى عشان عايزاك، ولما روحتلها قالتلي إن ريتاج بنتها بتعملها على روحها واتصرف في الموضوع عشان أنا تعبت، وقالتلي اضربها وخوّفها عشان متعملش كدة تاني، فجيبت سلك الكهرباء ده ولسعتها على جسمها بيه، فطلعت تجري منى فجیت أجري وراها لقيتها وقعت على الأرض وأغمى عليها فشيلتها على إيدى ونزلنا أنا وسارة خدنا توك توك وطلعنا بيها على المستشفى.
وتابع في التحقيقات: ولما وصلنا المستشفى كان في ظابط موجود ساعتها، سألنا مين اللى ضربها فسارة ردت وقالت أبوها اللي ضربها اللي هو واقف برا ده، اسمه علي، فالظابط خدنا معاه على القسم وإحنا قاعدين لقينا جوز سارة جه مقبوض عليه، وحققوا معانا في القسم وبعدين خدونى على شقتي اللى سارة ساكنة فيها وجبنا سلك الكهربا ده ورجعنا تاني على القسم، ونزلونا الحجز كلنا وهو ده كل اللي حصل.