فاكر انك بتحب ؟ طب جرب تتكلم بلغة قلبه
بقلم / هاميس جمال
مقال النهارده بعنوان لغات الحب الاول يعني ايه هو حب ؟؟هبتدي بأنى أقول إن ما حدش فينا محبش قبل كدة و لو حتى حب المراهقة ! فى اللى أتحب زي ما هو كان بيحلم وزي ما كان بيشوفوا ف خياله ،، وفي اللي عاش عمره كله بيدور بأنه يحقق حلمه و يلاقي حب حياته ، وفي اللي خاف منه وهرب بأقصى سرعته وهاجر الحبيب ومهما كان درجه الحب في قلبه زي ما غنت كده الست ام كلثوم وقالت غصبت روحي على الهجران وانت هواك بيجري في دمي !! طيب ايه هو اللي يخلينا نهرب من الحب واللي يخلينا نهجر الحبيب مهما كانت قوه محبته في قلوبنا ؟؟
يمكن لاننا ما تحبناش بالطريقه اللي إحنا كنا بنتمناها وبالطريقه اللي إحنا عاوزينها ؟؟
حقيقي في ناس فعلا بتهرب من الحب لانها متحبتش بالطريقة اللى تريح قلبها و شافت و لاقت أن الحب مشاعر مرهقة جداً لقلبة بدل ما تكون مشاعر راحة و أمان ، و لان لكل واحد فينا لغته في الحب انا بحب ايه وعاوز يتقدم لي ايه و الطرف التاني كده او الشريك التاني كده انا بحب ايه وعاوز يتقدم لي ايه تعالوا كده نتكلم ببساطه ايه هي لغات الحب اول لغه معانا وهي اسمها
• «كلام الحب والتقدير » …
في ناس طول الوقت بتحب انها تسمع كلام حلو يتقال ليها دايما كلام تقدير و إطراء ، تعالوا نعرف بعض الكلمات اللى بيحبها الشريك الآخر ف أستمرار الحب بالنسبه ليه (انت حلوه النهارده جداً – فستانك شيك جداً – ريحه برفانك رائعه – انت كل يوم احلى من اللي قبله ، كتر خيرك تعبت معايا النهاردة ، حياتى حلوة بوجودك جنبى ) ,صدقونى الناس دى مش تافهه ولا عقلها فاضى زى ما ممكن البعض يوصفهم ، و يمكن تبان كلمات سهله وبسيطه لكن صدقوني حقيقي بتفرق جداً مع الشخص اللي بيحب أن تكون دى لغه الحب بالنسباله أنها « الكلام والتقدير »قولوا لبعض كلمه حلوه مش هتخسروا حاجه صدقونى ، بالعكس أنت هتكسب قلب حقيقى من اطيب ما يكون !!
في لغه تاني مختلفه خالص بقى وهي :-
• « الوقت » وهنا لما بتكلم عن الوقت ما اقصدش ان إحنا نبقى قاعدين مع بعض وكل واحد فينا ماسك تليفونه او مشغول عن الطرف الثاني !! الوقت هنا اللي انا اقصده اننا نكون متواجدين مع بعض بنفكر مع بعض بنتكلم مع بعض مشغولين سوا احنا الاتنين بحاجه بنحبها و مشتركة بينا ( مناقشة فى موضوع يهمنا ، مشاهدة فيلمنا المفضل ، حتى لو هنلعب لعبه تجمعنا ، القاء النكت و مشاركة البسمة ) كثير بنكون قاعدين كلنا في تجمعات لكن كل واحد مشغول عن الثاني بحاجات كتير جداً ، يمكن اه الدنيا وخدانا فى تيارات الانشغال و لكن حاول تجمع للطرف التانى شويه وقت ، لأنه بيكون محتاج لوجودك جنبه لكن يمكن بيخاف يعبر عن الاحتياج دة ، فى أشخاص محتاجه الشريك متواجد معايا ، و لكن مش بس بجسده و لكن بالمشاركة و إحنا قاعدين مع بعض نشترك سوا في النشاط يضمنا احنا الاثنين صدقوني حتى لو لعبه بسيطه يشتركوا فيها هم الاثنين صدقوني ياما ناس قاعدين مع بعض لكن كل واحد في دنيا غير الدنيا ولما هي تيجي تشتكي او هو يجي يشتكي تقول ما انا قاعد معاك اهوو !! احنا اه قاعدين مع بعض لكن كل واحد فينا تايه في عالمة الخاص بيه، ورافض تمام الرفض أنه يشارك الطرف الاخر في العالم بتاعه وكأنه مش من حق الشريك يدخله ولا هو ينفع اصلا يقرب من الدايرة بتاعتنا ، كلنا حبسنا نفسنا جوه نفوسنا تحت مسمى الخصوصية حتى و لو على حساب مشاعر و احساس الطرف الآخر بالوحدة ،.
الاشخاص اللي لغات الحب عندها هي الوقت بتكون طلباتها بسيطه جداً مجرد انك لو اديتهم في اليوم ساعه او اثنين و شاركتهم في الحب ده بمشاركه حقيقيه اتكلمنا في موضوع سوا شاركنا مع بعض في افكارنا شاركنا بعض في بعض الانشطه ولو كانت بسيطه هيفرق جداً مع الطرف الثاني لان هي دي لغه الحب بالنسبه له انك تشاركني واني أشاركك مش إن كل واحد فينا يكون محبوس جوه دايره هو اللي صنعها بنفسه ورافض رفض تام مشاركه الاخر ليه .
في لغه حب تالته اسمها الهدايا
• « الهدايا »
يمكن لأول وهله الكلمه دي تزغلل عين ناس كثير ولكن صدقوني الشخص اللي شبعان من كل حاجه في حياته مش هتفرق معاه الهدايا ، مقدرش أنكر أن في ناس بتعرف تعبر بالحب بأنى اجيبلك هدايا طول الوقت سواء محتاج او مش محتاج بس انا عاوزه اجيب لك هديه حلوه، هى لغه جميله وكتير بتعجب ناس مننا ولكن في ناس تاني ما بيفرقش معاها غير انك تكون معايا و أنى عاوزه وجودك جنبي هقول لكم حكايه كده صغيره بمناسبه الهدايا ( حكايه سما و محمد ) كانت دائما سما بتحب الكلمه الحلوه وتطلب دايما من محمد الكلمه حلوه و التقدير ، لكن هو كان عنده مشكله ف انه ملوش ف التعبير عن حبه ليها بالكلام ولا التقدير ، فكان بيعبر بطريقه تاني وهو الهدايا كان طول الوقت بيجيب لها هدايا مهما كانت بسيطه مهما كانت غاليه مش فارق معاة ، لكن المهم أنه يقدم هدايا لحبيبته ، لحد ما جات في يوم فجاه سما غضبت و ثارت عليه ، لانها مش عاوزه هدايا هي عايزه منه كلمه حلوه وتقدير هنا وقتها محمد كان محتار انا بحبها بس هي دي لغه الحب عندي اني اكرمها واجيب لها هدايا !!
الاختلاف هنا هو ما كانش عن الحب ، لان هما الاثنين بيحبوا بعض ولكن كان لكل واحد فيهم لغة مختلفة للتعبير عن حبه ، و الاختلاف هنا أن محدش فكر و لو لحظة ( هو الطرف التانى عايز بتحب ازاى ) ف كل واحد كان بيعبر بطريقه مختلفه تماما عن احتياج الطرف الثاني . هنرجع تاني لباقي المقال بتاعنا وهنتكلم عن لغه رابعة و هى
• « خدمة و مساعدة »
الخدمه والمساعده في ناس شايفة أن الحب هو تقديم الخدمة ٢٤ ساعة للطرف الثاني فبالتالي طول الوقت ( انا بخدمه – انا شيلاه جوه رموش عينيا – انا مش مخلياه يطلب اي حاجه ) تصرفات حلوه وجميله ولكن مش يمكن مش هي دي اللي الطرف الثانيه عاوزها في ناس تاني علشان انت تعبر لها عن حبك هي بتطلب منك طول الوقت خدمتها عايزاك تحت الطلب فى أى وقت مش مهم بقي تعبك أو راحتك فين ، المهم إنك تقدم خدمات معنويه و نفسيه وجسديه .. عاوزاك دايما جنبها في الخدمه هو ده كل اللي هي بتعبر بيه عن الحب اخدمني هحبك ما تخدمنيش انا مش هحبك هي دي لغه التواصل بالنسبه لها والشخصيه اللي زي دي هتبقى مرهقه نفسيا وجسديا ليك لان هو ده اللي هي بتطلبه في تعبير الحب انك تخدمني ليس الا .
• اللغة الخامسه و هى « اللمسه الحنونه » …
اللمسه الحنونه هنا معناها أنى ( محتاج منك طبطبه – محتاج حضن – محتاج نظره فيها حنان و احتواء – محتاج تشجيع) الناس دي بالنسبه لها اللمسات مهمه جدا مش اقصد بيها اللمسه الشريره ولكن اقصد بها الأمان و الاحتواء هو ده الحب بالنسبه ليهم اللمسه الحنينه بالنسبه لهم هى قمة الاشباع ، هي كل الدنيا اللى بتمدهم بأمان رهيب يمكن احنا مش بنفهمه ، لكن بالنسبه ليهم حاجه كبيره جداً .
مشكلتنا الأساسيه في لغات الحب ان كلنا بندي اللي احنا عاوزينه وبنطالب الشريك انه يدينا كمان اللي احنا عاوزينه لكن ما حدش فينا بيفكر طب هو الشريك عاوز يتحب ازاي ؟! والشريك اللي انا بقصده هنا مش شرط زوجين ممكن يكونوا اثنين اصدقاء كل واحد فيهم ليه طريقته في التعبير عن الحب وليه طريقته في احتياجه للحب ممكن كمان تكون الاسره جوه البيت سواء أب أو أم أو أولاد ..
الحب جميل والتعبير عنه أجمل لأنه بيزود العلاقات سعادة و راحة ، علشان كده يا ريت نفهم الطرف الثاني محتاج ايه ، الطرف الثاني عاوز يتحب ازاي علشان نعيش حقيقي ف حياه كلها سلام ووئام وكلها ترابط
اكتشفت مع مرور الوقت والزمن ان مشاكلنا حلها سهل جدا وهي اننا نقدم الحب للطرف الاخر بالطريقه اللي هو عاوزها ، مش بس اللى أنا بقدمها .
فنصيحه مني قبل ما تطلب لغه الحب المناسبه ليك من الطرف الثاني بالطريقه ، قدمله هو كمان الحب بالطريقه اللي هو عاوزها مش اللي احنا مصممين نقدمها لهم ..
طرق الحب مختلفه زي ما شخصيتنا كمان مختلفه .
دمتم في كامل المحبه والسلام مع نفسك والاخرين .