إزاي أتصرف بعد الفُراق مع الإدمان العاطفي
✍️ كـتبـت / إيـمـان فـرج
مرحلة التعلق أو الإدمان العاطفي :
أهم أسبابها إنك أثناء وجودك في علاقة ما سواء زواج خطوبة ارتباط
1. يومك بيكون مليان بالشخص ده.
2. هرمونات السعادة بتكون في أعلى معدلاتها، زي هرمون الأوكسيتوسين أو النورأدرينالين. أول ما تسمع كلمة “بحبك” أو تتخيّل إن حبيبك بيحضنك، جسمك بيفرز الهرمونات دي، وبتدخل مرحلة الإدمان. والنتيجة؟ صعوبة تصديق إن الشخص ده ممكن يسيبك.
3. يومك كله متمركز حواليه بتفاصيله، ومحدش يقدر يملأ فراغه.
4. الثقة العمياء في كل كلمة بيقولها.
5. العشم.. اللي يخليك فاكر إنه راجع، بينما هو ممكن أصلًا يكون خرج من حساباته.
6. خسارة قاعدة كبيرة من أهلك، صحابك أو حتى شغلك.
7. “الحب الوهمي”.. اللي هو رومانسية وكلام معسول في البداية أو وقت ما يكون محتاج منك حاجة.
8. دخوله وخروجه من حياتك بعد كل خناقة، ودايمًا بيرجع أحسن من الأول، وده بيخليك تفضّل مستني حتى لو اختفى فترة طويلة.
—
إزاي أعدّي مرحلة الإدمان العاطفي:
1. التسليم بالفُراق: اعترف إنه خلاص وقع، الشخص ده مش هينفع يدخل حياتك تاني. ولو رجع، لازم يلاقيك شخصية مختلفة، قوية ومستقلة.
2. التعامل كـ Single: خلاص العلاقة انتهت. متستناش حد يفرّحك، إنت اللي تفرّح نفسك: خروج، فسحة، أكل في مكان حلو، أو مقابلة ناس بتحبهم.
3. التفريغ بالبُكاء: عيّط براحتك. اعترف إنك إنسان عندك مشاعر. اكتب أو ابكي، لكن اوعى تنسى إنه دمرك وسابك.
4. تمرين الوسادة: احضن مخدة واصرُخ فيها لحد ما تطلع كل الطاقة السلبية.
5. الكتابة أو التسجيل: اكتب كل اللي نفسك تقولهوله أو سجّله بصوتك، وبعدها امسحه أو إحرق الورقة. كرر التمرين.
6. العودة للدائرة القريبة: تواصل مع أهلك وصحابك، واعتذر عن غيابك. شارك مشاعرك مع أقرب حد ليك، الحضن والفضفضة بيساعدوا في العلاج.
7. القُرب من ربنا: صلي، واطلب العون من ربنا. اعرف إن الأحق بالحب هو الله اللي عمره ما أذاك.
8. استغلال وقت الفراغ: تعلّم لغة، مهارة، كورسات، تطوع، أعمال يدوية، أو شارك في أنشطة خيرية.
9. المشي والخروج: اكتشف نفسك من جديد واشتغل على تطويرها.
10. الاهتمام بالشكل: لو وزنك زايد اخس، لو رفيع قوي انزل جيم. اهتم بنفسك ومظهرك.
11. التطوير الذاتي: خطط للنجاح، خُد كورسات، تعلم دين، افتح قناة، شارك معرفتك.
12. أوعى تراقب: الصفحة اتقفلت، متستناش عودة شخص مؤذي.
13. فتح دايرة جديدة: اتعرف على ناس جُدد وشاركهم طاقتك الإيجابية. ممكن يكون بينهم شريك حياتك المناسب.
14. مقاومة الفضول: بلاش تدور تعرف عنه أي حاجة، هو حر في حياته.
15. طرد الأفكار: كل ما ييجي على بالك، غيّر تركيزك فورًا.
16. تعويض العاطفة بشكل صحي: اقرأ روايات رومانسية، اتفرج على أفلام، أو اكتب حب لشخص منتظره في المستقبل.
17. التخيل الإيجابي: تخيّل نفسك متجوز وسعيد مع شخص مناسب. عقلك مع الوقت هيصدق الفكرة.
—
الخلاصة
المقاومة مسؤوليتك إنت. لو منعت المراقبة، شغلت يومك، مليت حياتك بناس جديدة، واعترفت إن العلاقة كانت سامة، هتتعافى خلال وقت صغير
حب نفسك قبل أي حد.
خلي كرامتك وعزّة نفسك فوق أي علاقة.
اعرف إن اللي بيحبك بجد عمره ما هيجرّحك أو يسيبك تبكي.
وفي يومها نقدر نقولك: مبروك.. إنت متعافي من علاقة سامة.
وصدقني، الأيام بتدور.. وحقك هترجعه الأيام بطريقتها. لكن الأهم إنك تكون أقوى، لأن حوالك ناس كتير بيتمنوا انك تكلمهم بس