لافينيا….اسم كبير خطف الانظار لطفلة عمرها 13 عام.
حاورها / اكرم الكراني
لافينيا نادر مش مجرد اسم جديد وموهبة صغيرة تحبو في فضاء الفن بلطف وذكاء شديد ..بدايتها كانت من الافلام القصيرة و اخر اطلالتها كان اشتراكها مع الفنان اكرم حسني في رمضان بمسلسل (بابا جه) ..
..(1)..الفنانة الشابة لافينينا..
كلميني عن بدايتك.
✍️
كلمة السر بابا
لافينيا..كلمينا عن بدايتك وخصوصا انك بداتي وعمرك صغير؟
بدايتي كانت في مسلسل نقل عام بطولة النجم محمود حميدة وإخراج عمرو أديب والسبب بابي لأنه هو كان بيمثل من حوالي 20 سنة بس كان ساب التمثيل بسبب شغله والسفر خارج مصر ولما حب يرجع التمثيل من حوالي ٤ سنين قدم في ورشة النقابة وهو بحفظ مونولوج انا حفظته ولما قلت له استغرب لانه صعب لكن لما مثلت عجبه وصورني فيديو وهو كان بيمثل دور وكيل نيابة في مسلسل نقل عام ولما عرف انهم عايزين طفلة ٨ سنين قالهم عليا وأستاذ عمرو أديب اتفرج على الفيديو اللي بابي صورهولي فعجبته ووافق عليا وبعد لما مثلت أول مشهد كلهم اعجبوا بيا وسقفوا لي واستاذ عمرو أديب كبر لي الدور وشركة الانتاج اتصلوا بوالدي علشان يبعت لهم اسمي بالضبط علشان يتحط في تتر البداية رغم اني كنت اول مرة امثل
………
(2) كلميني عن تجربتك مع مسلسل بابا جه
✍️
بابا جه من افضل تجاربي حتي الان…
تجربتي في مسلسل بابا جه مع أكرم حسني من أحلى التجارب اللي في حياتي لان طبعا حجم الدور كبير اوي يعني قصة المسلسل كلها عن علاقتي ببابا فالبطولة في المسلسل كلها لاكرم حسني وانا وعلاقتنا ببعض وعلشان كده كنا على طول في الكواليس مع بعض علشان نجهز المشهد مع بعض ولو هنزود حاجة او هنغير حاجة في المشهد او هنعمل افيه معين فعلاقتنا كانت قريبة اوي من بعض وكنا طول الوقت بنضحك ونهذر مع بعض وضحكنا بيبقى جايب آخر اللوكيشن وكمان لما سجلت معاه أغنية تتر المسلسل والكوبليه اللي غنيته كان هو ترند الأغنية( نفسي أجيب كلب بابا قال لي لاء .. كل ما أقول لحد يقول لي بابا عنده حد .. مش مقدر إيه هاممني …… ) وبجد نفسي أعمل حاجة تانية تكون بقوة مسلسل بابا جه لأنه كان فيه رسالة مهمة اوي وفي نفس الوقت كوميدي فكل الأطفال والكبار حبوه
(3)..
مين هما اهم ٣ نجوم اتعلمتي منهم الاداء؟
✍️
…..حنان مطاوع واكرم حسني وامينة خليل قدوتي الفنية
أول وأكثر نجمة استفدت منها هي النجمة الحنونة حنان مطاوع اللي مثلت معاها في مسلسل صوت وصورة وهي اللي رشحتني في المسلسل لأنها كانت شافتني في مسلسل سره الباتع إخراج خالد يوسف لان انا كنت بمثل شخصيتها في المسلسل وهي صغيرة فأعجبت بيا ورشحتني بدور بنتها في مسلسل صوت وصورة وهي فعلا أم تانية ليا ولغاية دلوقتى فيه اتصال بيننا ودايما تتصل بيا تطمن عليا بعد الامتحانات ونعيد على بعض فعلا انا بحبها جدا .. ثاني نجم طبعا أكرم حسني لانه السبب في دخولي مجال الغناء لما أغاني فرصة أغني معاه تتر المسلسل .. ثالث نجمة هي أمينة خليل لما مثلت معاها في فيلم شماريخ اخراج عمرو سلامة وهي حبتني اوي من اول مشهد مثلته معاه رغم أنها ماكانتش تعرفني قبل كده بس بعد كده بقت بتحبني اوي
(4)…..طموحك اي بعد خمس سنين مثلا او لما تكبري شوية؟
.طموحي مش اقل من اوسكار
طموحي اني اكون اول ممثلة مصرية تفوز بجائزة الأوسكار كأفضل ممثلة عن فيلم مصري وبعدين أبقى ممثلة عالمية بجانب الغناء والباليه
(5) ..تحبي تتواجدي اكتر في اي وسيلة اعلامية..بمعني تاني تحبي. الدور ييجيلك سينما ولا مسرح؟
✍️
….المسرح والسينما والتلفزيون كل واحد له طعم وجمهور التلفزيون اكبر….
أنا بحب الثلاثة السينما والتليفزيون والمسرح علشان كل حاجة فيهم ليها طعم مختلف في النجاح يعني السينما لما بعمل فيلم ويبقى كل الصحفيين والاعلامين يعملوا لقاءات معايا في العرض الخاص للفيلم ويعرفوني قد ايه الناس بتحبني وأنهم معجبين بيا واشوف رد فعل الجمهور والمدعوين في السينما في العرض الخاص طبعا دي حاجة بتفرحني جدا .. التليفزيون طبعا لان جمهوره أكثر وبيسبب
شهرة اسرع ووصول لأغلبية الناس واهتمامهم وشغفهم بمعرفة ايه اللي هيحصل في الحلقة اللي جاية والتواصل معايا على السوشيال ميديا كل ده بيسعدني جدا طبعا .. المسرح بقى انا بشوف تقدير الناس وحبهم ليا في لحظتها من اول تحيتهم ليا لما ادخل المسرح وبعد كل كلام ليا اول افيه بيضحكوا او يسقفوا وتحيتهم ليا في آخر العرض طبعا ده احساس مختلف بالفرحة خالص لانه يعتبر لايف
(6)…..
تحبي تكملي دراستك في اي مجال؟
✍️
عايزة ادخل معهد فنون مسرحية
ان شاء الله هدخل المعهد العالي للفنون المسرحية قسم تمثيل وإخراج علشان اتعلم أكثر واكثر
(7)
….رايك في مجال الاعلانات والافلام القصيرة؟
الافلام القصيرة والاعلانات متعة تانية خالص
✍️
أنا مثلت فعلا قبل كده في فيلم قصير اسمه مثلث القيادة لقصص حقيقة عن شهداء الجيش واتعرض على سيادة الرئيس عبد الفتاح السيسى في احتفالية يوم الشهيد وانا وابطال الفيلم محمود عبد المغني وأحمد جمال سعيد ومحمد السويسي طلعنا على المسرح لالقاء التحية على سيادة الرئيس فأنا معنديش مشكلة خالص اني أمثل في أفلام قصيرة بس يكون لها محتوى ومضمون هاتف والفيلم يتعمل حلو ما يبقاش حاجات low budget .. وبالنسبة للاعلانات انا كنت هيرو اعلان سلاح التلميذ والاعلان كان حلو أوي في فكرته وفي الإخراج وانا كنت مبسوطة أوي به يعني برده معنديش مانع أعمل اعلانات بس اكون فيها بشكل لذيذ