فوبيا صنع القرار
بقلم الكاتبة / هاميس جمال
كام مرة وقفت قدام نفسك محتار ومش عارف تاخد قرار في حياتك؟
كام ميعاد لغيته لمجرد أنك محتار تروح أي واحد فيهم ؟ وكام مرة وقفت قدام دولابك مش عارف تختار ملابسك؟
هو إحنا للدرجة دي مش عارفين ناخد حتى أبسط قراراتنا؟
في الحقيقة .. آه ! في ناس فعلاً عندها فوبيا من إتخاذ القرار ، جواهم رعب حقيقي يكّفي العالم كله، وكأن الواحد منهم داخل معركة مش عارف مين الخسران فيها ؛ هل هو؟ ولا الخوف اللي جواه من فكرة الاختيار؟
و ده مش ضعف منه ولا قلة حيلة ، هو بس محتاج يفهم نفسه ويعرف هو عايز إيه بالتحديد .. محتاج يحس إنه واقف على أرض صلبة، و يطمن إن قراراته سليمة .
ولكن يا عزيزي أحب أطمنك وأقولك: مش لازم كل قراراتنا تكون سليمة بنسبة 100%، مفيش حد فينا كامل وصح في كل اختياراته غير الله وحده . أنا حاسة بيك وبمدى التشوش الذهني والصراع اللي جواك ، سامعة صوت القلق والتوتر وأنت بتتهم نفسك بالضعف . لكن خليني أشيل عنك الخوف ده ، وأقولك إنك مش لازم تكون شخصية ناجحة بدرجة الكمال المطلق ، فالقرار في حد ذاته محتاج منك حاجة أهم و هو ” قراراً بالتنفيذ ” ، و أنك تكون صاحب شخصية قوية .
طيب قبل ما نتكلم و نقول إزاى تصنع قرار ناجح نتكلم فالأول عن أنواع القرار ..
فى رأيى المتواضع أن القرارات { ٣ }أنواع …
أولهم .. قرار واجب التنفيذ و ده بمعنى إنك صاحب القرار و مينفعش حد غيرك ياخده بدالك زى مثلاً ( زواج او نوع دراستك أو مجال عملك ) ده قرار لازم تاخده لا مفر .
ثانياً.. قرار سريع و دة طبعا فى أوقات بتحتاج منك تدخل سريع فى إتخاذ القرار زى مثلا أنك عايز تشترى حاجة معينه و البائع قالك أنها مش موجودة و لكن فى بديل ! هنا أنت محتاج قرار سريع بشراء البديل ولا الرفض ، و ما شبه ذلك من القرارات السريعة .
ثالثاً .. قرارات مؤجله ، و دى سهله جدا لأن معاك وقتك الكافى لإتخاذ القرار و بعد تفكير متأنى منك .
رابعاً .. قرار صارم ، بمعنى لا رجعة فيه لأى سبب
دى أنواع القرارات ، نبدأ سوا فى معرفة ازاى تصنع قرار ناجح بدون خوف أو ندم ؟
علشان نكسر الفوبيا دي ونبدأ ناخد قراراتنا بقوة و بثقة ، هقولك على خطوات عملية وسهلة تخلي تفكيرك منظم …
1. حدد الهدف والسبب بوضوح :- قبل أي حاجة، اسأل نفسك ، أنا باخد القرار ده ليه؟ وإيه العائد عليا منه؟
و أتأكد أن القرار العشوائي لا يصنع نجاح ، وافتكر إنك ما أنت متخلقتش عشوائي وليك دور في الحياة ، لازم قرارك يكون ليه دور في حياتك .
2. إبحث عن المعنى والقيمة: اِختر القرارات اللي تحس معاها بالسعادة والنشوة وأنت بتنفذها خطوة بخطوة، وتفرح بنجاحك وأنت شايف بذرة قرارك بتنمو قدامك.
3. حوّل القرار لالتزام (قرار التنفيذ): لازم لصنع أي قرار إنك تكون واخد معاه قرار التنفيذ ، وما يكونش مجرد كلام نظري، ووقت الجد مفيش فعل .
4. رتّب أفكارك ونقاط البداية: ضع نقاطاً محددة تبدأ بيها علشان تفكيرك يكون منظم ،
و اعرف هتبدأ من أى نقطة بالظبط، دة مهم جداً علشان ما تحسش إنك تايه وسط التفاصيل .
5. ركز على الجانب الإيجابي: احرص إن قرارك يكون إيجابي، بمعنى إنه يزود نجاحك و يطورك ، سواء في مجال العمل أو في علاقاتك الشخصية مع المجتمع المحيط بيك.
6. حيلة الورقة والقلم: لو كنت في حيرة شديدة، هات ورقة وقلم و اكتب المميزات في خانة والعيوب في خانة تانية.. لو لقيت المميزات أكتر، فده دليل وبوصلة على إنك ماشي في الطريق الصح.
و أخيراً …
عايزاك تتأكد عزيزي القارئ أن أخذ القرار مش مجرد زرار هندوس عليه وفجأة يتنفذ، ولكنه بيحتاج وقت كافي للتفكير، ووقت أكبر في طريقة تنفيذه.
التردد مش عيب، ولكن العيب إنك تفضل واقف مكانك تحت مسمى إنك مش عارف تبدأ منين .
متقلقش .. أنت مش محتاج غير تحديد الهدف ، وإتخاذ القرار ، ثم السعي في تنفيذه .. مش أكتر من كدة.
دمتم بسعادة وقوة داخلية لصنع جميع قراراتكم بقوة إرادة.