“مالناش دهوة ياموهى
بقلم / رضا طلعت فهيم
هنا كل واهد ف هاله”
جملة عابرة اتقالت ف فلم فول الصين العظيم وضحكنا وعدت…بس الجملة ديه داخله ف ثقافة كل الدول المتقدمة مالناش دعوة بالتانى
وانت ماشى ف أوروبا ف الشارع أو قاعد ف الأتوبيس ممكن تلاقى واحد وواحده قرروا يحضنوا بعض أو يبوسوا بعض ومنهم مراهقين طبعا….بيبقى رد الفعل إن مافيش رد فعل ولا إهتمام بالحدث اصلا..
وممكن تلاقى واحد ماشى بلبس مقطع أو ست عجوزة راكبة عجلة أو أو أو…
وحاجات كتير لكن كل واحد ف حاله
لكن عندنا هنا بقى انا هبقى ف حالى وف حالك وف حال اللى يتشددلك
مناخير الناس ف حياة كل الناس بشكل مستفز
اتجوز فلانه ليه وماتجوزش فلانة التانية؟؟
جاب فلوس العربية منين ؟
شقته تمليك ولا إيجار؟؟
صيفوا ولا لسه ؟ طب صرفوا كام ؟
هو مرتبه يكفى كل الفسح ديه ؟ بيجيب مصاريف المدارس منين؟؟
معقول مش عاجبها ولا عريس ؟؟
جابلها شبكة بكام ؟ ومنين ؟ وازاى؟
بيقبض كام من شغله ؟
هو مسيحى ولا مسلم ؟؟
طب بيصلى ولا ﻷ ؟؟
مافيش حاجه جايه ف السكة ؟؟
عاوزين نفرح بعيالكم؟؟
علطول بتضحك ومتشيكة أكيد عايشة ومرتاحة ؟؟
بوستاتها كلها بتضحك أكيد مافيش حاجه مزعلاها؟؟
مش هانفرح بيكى بقى؟؟
مخطوبة بقالها كتيير ايه حكايتها؟؟
اتزفتت على عينها ولا لسه ؟؟
لو كل واحد خلاه ف حاله وأهتم بتطوير نفسه وتسديد نواقصه هتبقى الحياة زالفل اه بأمانة زامبقولك كده